Konsehal Dizon mihilak

CEBU, Philippines - Nakahilak si  Konsehal Alvin Dizon kay wala siya magmalampuson sa pagpa-override sa veto power sa mayor kabahin sa wala pagpirma niini sa ordinansa nga nagmando unta og usa ka tuig nga moratorium sa pagpangguba sa kabalayan nga anaa gitukod sa public lands.

Ang masub-anon nga konsehal mi-resign sa iyang pagka tsirman sa Committee on Housing sa City Council kay matud niya dili siya epektibo sa iyang katungdanan aron panalipdan ang katungod sa mga kabus.

Si Vice Mayor Edgardo Labella nga maoy wala mopirma sa ikaduha nga moratorium ordinance nga gipasar sa konseho diha nga siya pa ang acting mayor atol nga gisuspenso pa si Mayor Michael Rama, mihangyo ni Dizon nga dili modayon sa pag-resign pagka committee chairman.

Apan si Konsehal Dizon hugot sa iyang baruganan nga mo-resign pagka tsirman sa Committee on Housing ug misugyot nga si Konsehal Nida Cabrera maoy mohulip kaniya, apan kini gibalibaran usab ni Cabrera.     

Matud ni Dizon nga tinguha gyud unta niya nga mahatagan og usa ka tuig nga moratorium ang pag-demolish sa kabalayan sa mga informal settlers aron ang kagamhanan makapangita og dapit nga ilang kabalhinan ug ang mga hingtungdang pamilya makapangandam.

Apan si Labella nga mao na ang nag-preside sa sesyon sa konseho kagahapon milantugi nga ang pipila ka lagda sa maong ordinansa nakalapas sa gilatid sa Republic Act 7279 kon Urban Development and Housing Act.

Napulo ra ka konsehal ang alyado sa Bando Osmeña Pundok Kauswagan (BOPK) diha sa konseho mao nga si Dizon nanghangyo  gyud unta sa iyang mga kauban nga alyado sa Team Rama nga suportahan siya sa pagpa-override sa veto power sa mayor.

Apan sa lima ka konsehal nga sakop sa Team Rama, si Konsehal Nendell Hanz Abella lang maoy mosuporta kang Dizon mao nga wala makuha ang 12 votes nga maoy gilatid sa balaod nga ma-override ang usa ka gi-veto nga ordinansa.

Ang nibotar nga i-override ang gi-veto nga ordinansa mao sila Konsehal Mary Ann delos Santos, Eugenio Gabuya, Alvin Dizon, Lea Japson, Nida Cabrera, Sisinio Andales, Margarita Osmeña, Roberto Cabarubias, Nendell Hanz Abella, Alvin Arcilla ug si Nestor Archival.

Ang wala misuporta mao sila si Konsehal Noel Wenceslao, Richie Osmeña, Gerry Carillo, James Cuenco ug Konsehal Dave Tumulak.

Si Labella mipasabot nga dalaygon gyud ang lakang ni Dizon apan dili niya kini masuportahan tungod kay adunay mga lagda niini nga wala masubay sa balaod.

Matud ni Labella nga gilatid gayud sa balaod nga adunay katungod ang usa ka local government units nga mopaguba sa kabalayan nga anaa gitukod sa “danger area” sama sa daplin ug anaa na gyud sa kasapaan.

Apan ang pamahayag ni Labella wala na gyud makapugong ni Dizon sa iyang pag-resign pagka chairman sa Committee on Housing. (BANAT NEWS)