Nangamatay kay nabuthan sa bomba

CEBU, Philippines - Nangamatay ang duha ka managhigala human sila mabuthi sa karaang bomba nga ilang gitabangan paggabas sa pagtuo nga aduna kini sulod nga bulawan.

Nabuak ang lawas sa usa ka biktima samtang ang usa nahabwa ang ginhawaan dihang giugkat sila gikan sa nakay-ag nila nga payag didto sa Sitio Kamanggahan, Upper Pakigne, Minglanilla kagahapon sa kaadlawon.

Ang mga namatay mao si Michael Respecio, 48, taga Pakigne, Minglanilla ug Leonilo Adlawan, 43, taga Inayagan, Naga.

Matud ni SPO1 Rangie Lopez, imbestigador sa Minglanilla Police Station, nga nagtuo sila nga si Adlawan maoy nagdala sa vintage bomb sa maong dapit kay gikan pa kini sa dakbayan sa Naga. Kini tungod kay adunay grinder si Respecio nga magamit nila pagbuak sa karaang bomba.

Sa kakusog sa buto, milupad og pipila ka metros si Adlawan samtang si Respecio nga mao’y naggamit sa grinder, ang nasabak sa bomba ug nakay-ag ang dughan.

Sigun pa sa mga silingan nga nagpuyo sa maong dapit nga mura’g naigo sa linog ang ilang sitio human mibuto ang bomba.

Si Miguel Lañojan, silingan sa namatay niasoy nga nakamata sila sa kakusog sa buto.

Sa ilang pagsusi, samdan na ang duha diha sa payag.

"Napikas ang lawas ni Michael unya ang tuway-tuway nasiak. Kato iyang kauban nahabwa ang tinai,” matud ni Lañojan.

Samtang si Joan Jaime, kapuyo sa namatay naghilak nga nisaysay nga wa gyud misulti kaniya ang iyang kapuyo kun unsa ang ilang gibuhat sa iyang shop ug siya natulog na niadtong higayona uban sa ilang anak nga nagpangedaron og kwatro anyos.

Ikaduha na diay kadto nga bomba ang ilang napikas ug gihulagway nga ang unang bomba nakakuha sila og adunay sulod nga bulawan.

Apan ang mga silingan ug mismo ang kapuyo sa namatay wala makakita sa bulawan ug wa sab sila masayod kun diin gikan ang bomba nga gidala ni Adlawan. Ang kapolisan ug ang mga silingan sa nangamatay nakakuha pa og mga tipaka sa bomba nga pwerteng bug-ata. (BANAT NEWS)