CPDRC uyon nga laing ahensya ang mag-Oplan Greyhound
CEBU, Philippines - Uyon ang mga opisyal sa Cebu Provincial Detention and Rehabilitation Center (CPDRC) nga ang ubang ahensiya sa gobiyerno maoy mopahigayon og operation greyhound diha sa ilang prisohan.
Sa milabay’ng adlaw, ang Bureau of Jail Management and Penology (BJMP) pinaagi sa Cebu City Police Office (CCPO) ug Philippine Drug Enforcement Agency (PDEA)-7 nagpahigayon og operation greyhound sa Cebu City Jail, Mandaue City Jail ug Lapu-Lapu City Jail.
Nasakmit sa maong operasyon ang mga drug paraphernalia, mga appliances ug mga hait nga hinagiban ug uban pang butang nga giisip nga kontrabando ug gidili sa mga prisohan.
Si Marco Toral, Capitol Consultant sa CPDRC nagkanayon nga ang mga piniriso diha sa CPDRC gipasidan-an nang daan sa mga gidili.
Dili hinuon makapasalig si Toral nga walay nagtagotago og palusot sa sud sa CPDRC.
Aron di masamok ang mga priso, adunay gibutang nga telebisyon diha sa pasilyo nga makita sa tanan.
Mokabat lang 1,600 ka piniriso ang kapasidad sa CPDRC apan karon aduna kini 2,800 ka piniriso. Sa maong gidaghanon 110 niini mga babaye.
Dugang ni Toral nga 80 porsiyento niini nalambigit ang kaso sa gidaling drugas. (BANAT NEWS)
- Latest
