Wa’y shabu atol sa greyhound?

CEBU, Philippines - Gipahigayon sa Bureau of Jail Management and Penology pinaagi sa pagpakig-alayon sa Cebu City Police Office ug Philippine Drug Enforcement Agency-7 sa tulo ka city jails sa Sugbo, Lapu-Lapu, ug Mandaue sayo kagahapon sa buntag.

Sa Cebu City Jail-male dormitory, alas 5 gisugdan ang greyhound operation nga gitawag og “Oplan Galugad” diin ang tanang piniriso gipagawas sa ila’ng mga selda.

Nagkalain-laing kontrabando ang nasakmit sama sa drug paraphernalia, mga mahait nga hinagiban ug mga appliances ang nasakmit apan wala’y ilegal nga drugas.

Matud ni BJMP-7 Director Allan Iral nga sa Cebu City Jail lang daghan sila og nadakpan nga mga dalaw nga suway nga nipalusot og mga kontrabando.

Mando ni Iral sa mga jail personnel nga sa gate pa lang ipahigayon na ang body search sa mga dalaw.

Gihimakak ni Iral ang report nga adunay shabu laboratory sulod sa prisohan samtang hugot usab nga gidili sa mga piniriso ang paghupot og cellphone sa rason nga mao kini ang magamit sa komunikasyon sa mga priso sa gawas.

Si Cebu City Jail Warden, Superintendent Johnson Calub niingon nga naningkamot sila nga dili malutsan og drugas.

Hinoon aduna sila’y mga tawo nga gipanid-an karon nga kusog mopalusot og mga kontrabado sa bilanggoan.

Atol sa pagsusi sa 54 ka selda, nasakmit usab ang mga ginamit nga foil alang sa pagsuyop, lighter ug mga plastic nga may lama sa shabu.

Lakip sa gipangsakmit ang mga television, speaker ug mga mahait nga hinagiban.

Matud ni Iral nga ang operasyon gipasikad sa kamanduan ni Secretary Mel Sarmiento sa Department of Interior and Local Government.

Kini human usab adunay nakuha nga drugas niadto’ng Enero 26 nga niabot og 98 gramos hinungdan nga sila nagtuo nga aduna gyu’y nakalusot.

Gitug-an ni Calub nga kadto’ng mga selda nga nakuhaan og mga kontrabando ipatawag sa disciplinary board ang mayor de mayores aron makahimo sa sunod nga lakang.

Usa sa lakang mao ang pagdili na sa dalaw sa ila’ng pamilya ug ang pagpasaka og kaso sa mga maaktohan diha sa iya’ng selda nga makuhaan og drugas.

Sa Lapu-Lapu City Jail, wala’y kontrabando nga nasakmit gawas sa  usa ka sim card, SD o memory card, usa ka syringe ug usa ka gamay’ng plastic nga may residue sa shabu sa male dormitory

Kini ang gibutyag ni City Jail Warden Dennis Aliño human sa operasyon. (Decemay P. Padilla, Rowena D. Capistrano ug Christell Fatima M. Tudtud/GMR)