Mayor Chiong nag-sorry sa principal
CEBU, Philippines - Nangayo og pasaylo si City of Naga Mayor Val Chiong sa prinsipal sa Tingub National High School nga nabiktima sa tulisan diha mismo sa eskuylahan nga giistaran sa mga delegado alang sa Central Visasyas Regional Athletic Association (CVIRAA).
Si Chiong nagkanayon nga dakong sagpa sa ilaha ang maong hitabo gumikan sa lapso sa ilang seguridad.
"We owned up our lapses, hoping that with the assurance of the police this will never happen again," matud pa sa mayor atol sa press conference sa City Hall kagahapon.
Hinuon gibutyag sa tigpamaba sa siyudad nga gidawat ni Abundio Benitez ang pagpangayo og pasaylo sa mayor kay nakasabot siya kay talagsaon ra gyud kini nga insidente.
Si Schools Division Superintendent Senen Paulin nagkanayon nga ‘isolated’ lang ang maong hitabo ug mipahibawo nga sa pagkakaron hapsay ra gyud ang dagan sa CVIRAA.
Ang pagpangayo og pasaylo gihimo sa mayor samtang padayon ang gihimong imbestigasyon sa kapolisan bahin sa maong pagpanulis.
Matud pa ni Police Superintendent Jovito Canlapan, ang pangulo sa Naga Police Station padayon gihapon ilang operasyon pag-ila sa tulisan nga gituohan nilang taga diha lang sa Langtad diin nahimutang ang Langtad Elementary School nga maoy gikatulgan sa mga delegado gikan sa Mandaue City.
Ang maong tulisan nagpailang sakop sa New Peoples Army ug migaid ni Benitez.
Tungod sa maong insidente, gimando ni Canlapan ang pagdugang og seguridad sa tanang mga tulonghaan nga gipuy-an sa mga delegado sulod sa 24 oras. Samtang ang Dakbayan sa Mandaue, nga gipangulohan ni Mayor Jonas Cortes, mipadala og security personnel ngadto sa Dakbayan sa Naga aron motabang sa seguridad sa ilang mga delegado.
Matud pa ni Roger Paler, ang pangulo sa Public Information Office sa Mandaue, mga job order employees sa dakbayan nga sakop sa Janitorial and Security Service Unit, nga napaubos sa training ang ilang gipadala. (BANAT NEWS)
- Latest
