SugbUanon nag Top 1 sa CELE

CEBU, Philippines - Laing tinun-an na usab sa Cebu Institute of Technology-University (CIT-U) ang nipamatuod sa ilang slogan nga “CIT Tops Again” human duha sa ilang mga estudyante ang nakasulod sa top 10 sa labing uwahing resulta sa Civil Engineering Licensure Examination.

Ang Professional Regulations Commission (PRC) mipagawas sa resulta sa Civil Engineering Licensure Examination niadtong adlaw’ng Martes sa gabii diin sa kinatibuk-an miabot sa 9,482 ang mikuha sa pasulit ug kapin lang sa 3,000 ang nakapasar.

Migawas sa resulta nga si Engr. Armand Henzkel Canoy, tinun-an sa CIT-U maoy nanghawod sa maong pasulit human nakakuha sa unang pwesto pinaagi sa iyang 94.80 percent nga passing rate.

Laing tinun-an sa maong tunghaan ang anaa sa ikaupat nga pwesto ug kini mao si Engr. Jerry Ricacho Marte Jr. nga nakakuha og grado nga 93.75 percent.

Nasayran nga 173 ka mga tinun-an sa CIT-U ang mikuha sa pasulit ug anaa lang sa 84 ang nakapasar o 48.55 percent sa nanguha niini.

Dihang nahinabi sa mga tigbalita sa Canoy kini miingon nga target gyud niyang makasulod bisan sa top 10 apan wala niya damha nga siya maoy manghawod sa tanan. Si Canoy, 22 anyos karon, residente sa Barangay Poblacion dakbayan sa Talisay, bugtong anak ug dihang 12 anyos pa kini misyonero na siya sa ilang simbahan ug nahimo niyang inspirasyon ang iyang mga ginikanan.

Migradwar si Canoy nga valedictorian  sa high school ug giila usab kini nga ‘King of Engineers’ ug Summa Cum Laude dihang migradwar niadtong Marso karong tuiga sa kolehiyo.

Ang Dean sa College of Engineering and Architecture sa CIT-U Dr. Evangeline Evangelista kinsa nagsaulog sa iyang adlaw’ng natawhan kagahapon miingon nga usa ka nindot nga birthday gift ang resulta sa pasulit.

Nasuta nga si Canoy mao ang ika-76 nga top placer gikan sa maong tunghaan ug sila si Marte mao ang kapin ika-600 ka tinun-an nga nasulod sa top 10 base sa ilang talaan.

Si Canoy mapasalamaton sa iyang ginikanan Henrisa Canoy, Manager sa usa ka BPO firm sa siyudad ug sa iyang amahan Armando Canoy, usa ka health care consultant. (BANAT NEWS)