Kontraktor ipatawag sa konseho

CEBU, Philippines – Hangyuon ni Konsehal Danny Caballero sa siyudad sa Talisay ang taga Department of Environment and Natural Resources (DENR) sa pagsusi sa lugar nga gihimong diversion road sa kontraktor sa road widening project diha sa barangay Lagtang ug Jaclupan kun kini wa ba makalapas sa three-meter easement sa sapa.

Kini human si Caballero ang nihimo ug pakisusi sa lugar human  nasanapan ang diversion road sa tubig human sa kusog nga bul-og sa tubig gikan sa bukid ug nakaingon sa pagkatanggong sa gatusan ka tawo pipila ka adlaw na ang nakalabay.

Matud pa ni Caballero nga una nilang gidudahan sa maong lunop mao ang kagamay sa culvert sa spill way nga gihimo sa QM Builders, ang kontraktor sa road widening sa Department of Public Works and Highways (DPWH).

Apan ning bag-ohay lang nagduda siya nga nigamay na ang sapa kun itandi sa unang panahon nga wa pa kini hilabti.

"Ako gyu'ng duda aning ilang diversion road mao ang naka-contribute sa lunop kay nagtuo ko nga nilapas ni sila sa three-meter easement sa sapa nga maoy naa sa lagda sa balaud," matud pa ni Caballero. Si Caballero mopalabang og resolusyon paghangyo sa DENR sa pagsusi sa lugar aron mahatagan og katin-awan ang tanan niyang pagduda.

Si Willie Abatayo, project  supervisor sa QM Builders ang miingon nga napalit sa iyang agalon ang lugar nga gipanukaran sa diversion road apan pakyas siya sa pagpakita og pagpamatuod niini ngadto ni Caballero.

Asoy pa niya nga napugos ang iyang amo sa pagpalit sa maong yuta aron nga dili mahasol ang mga motorista samtang sila naghimo sa pag-quarry sa bukid aron sa pagtapos sa ilang proyekto. Nag-abot si Caballero ug si Abatayo diha sa buhatan ni Kapitan Joel Orbiso sa Jaclupan tungod sa reklamo sa mga residente. Si Orbiso nibasol sa QM Builders nga maoy nakabulabog sa ilang barangay gumikan sa ilang pakyas nga pag-coordinate sa ilang buhatan matag aduna silay pagahimuong proyekto sa ilang lugar.

Gikatakdang imbitaron ni Caballero sa hawanan sa konseho si Alan Quirante kinsa tag-iya sa QM Builders aron mahatagan og katin-awan ang mga reklamo sa mga residente. - /EIM) (BANAT NEWS)