Drayber nakatulog, ginang giharos patay

CEBU, Philippines - Patay ang 56-anyos nga biyuda human giharos ug naguyod sa awto nga ang drayber nakatulog sa kakapoy sa biyahe Libjo, Tabogon pasado alas 11 sa nakalabay nga buntag.

Sa imbestigasyon sa kapolisan nga gipangulohan ni Senior Police Officer 1 Gregorio Licayan nasayran nga paingon na unta mopauli ang biktima nga si Perla Veronas gikan nitambong sa kasal sa pag-umangkon.

Gumikan sa kakusog sa bangga naguyod og pipila ka metros ang biktima ug nihunong lang ang sakyanan diha’ng nabangga sa poste daplin sa dalan.

Gidala sa tambalanan sa Bogo ang biktima apan nakabsan gyud sa iya’ng kinabuhi.

Nasayran sa kapolisan nga ang drayber nga si Jake Capangpangan, 22, taga Nangka, Consolacion, gikan naghatud og bisita gikan sa dakbayan sa Sugbo paingon sa Isla sa Malapascua.

Kagahapon sa alas 2 sa hapon gibuhian ra sa kapolisan ang drayber human nagkasinabot ra ug ang tagtungod sa biktima. (Jojo C. Ugdol ug Romeo T. Limpangog/GMR)(BANAT NEWS)