Caterer mipasalig nga maayo ilang pagkaon

CEBU, Philippines - Bisan og wala pa sila mabayari usa sa siyam ka mga caterers sa “packed meals” alang sa mga polis nga nagbantay sa Asia-Pacific Economic Cooperation Meet mipasalig nga limpyo ug maayong klase gihapon nga pagkaon ang ilang gihatud ngadto sa mga polis.

Si Chito Pernia, usa sa tulo ka mga caterers nga gikuha sa kapulisan sa dakbayan sa Mandaue miingon nga andam sila mohatud og pagkaon alang sa mga polis bisan wala pay pasiunang bayad.

Matud pa niya, 27 ka tuig na sila sa maong negosyo ug makadaghan na silang miserbisyo sa mga kalihokan sa kapolisan sa Mandaue mao nga nahibalo na sila nga dugay g’yud sila mabayran niini.

Apan bisan pa niini, wala nila gisakripisyo ang kalidad sa ilang mga pagkaon nga sagad duha ka takos nga kan-on, duha ka klase nga sud-an, sama sa utan ug karne, imnunon ug dessert.

Ang catering service ni Pernia gikontrata sa Mandaue City Police Office nga mohatud og 150 ka mga packed meals matag adlaw.

Mitingog si Pernia bahin niini human nabalita dinhi sa Banat News ang reklamo sa mga polis nga nadestino sa Mandaue nga ubos kaayo ang kalidad sa gipakaon kanila.

Si Sr. Supt. Mariano Natu-el Jr. acting city police director sa MCPO miingon mas dako ang budget nga ilang gigahin sa pagkaon sa ilang mga APEC security itandi sa Cebu City.

Matud niya sobra sa P300 ang kantidad sa food packs nga madawat matag adlaw sa ilang mga sakop.

Sigon ni Natuel ang gikuha nila nga caterer dul-an sa 30 ka tuig na nga anaa sa maong negosyo ug kini mao ang “Pinoy Adobo” nga mao ang catering service nga gipanag-iya ni Pernia.

Wala hinuon siyay nadawat nga mireklamo kalabot sa pagkaon gikan sa maong catering service.

Gani aron maigo ang budget nga P300, ilang gimenusan ang presyo sa matag food packs, gikan sa P135 gihimo kining P125, alang na kini sa paniudto ug panihapon samtang ang ilang pamahaw mokantidad og P50. (Jojo Ugdol ug Decemay P. Padilla/EIM)(BANAT NEWS)