Salisi gang nasipong

CEBU, Philippines – Human sa pila ka adlaw nga paghasi sa publiko nadakpan ra g’yud ang siyam ka mga sakop sa “Laglag Barya Gang” nga responsable sa sagunson nga pagpangawat dinhi sa Metro Cebu nga ang katapusang nabiktima mao ang asawa ni kanhi Cebu City councilor Joey Daluz III.

Unang nadakpan kagahapon si Jamboy Tagon sud sa usa ka mall sa A.S Fortuna sa siyudad sa Mandaue dihang iya untang biktimahon ang usa ka Hapon nga si Hiroshi Hirasaw, nga usa ka Jiu Jitsu Instructor.

Samtang anaa sa usa ka coffee shop si Hirasaw, migawas kini aron pagtubag sa tawag sa cellphone apan dunay babayeng miduol niya nga nailhan kadugayan nga si Jody Lasong ug nangutana kun duna kini sakyanan.

Bisan og walay sakyanan ang Hapon dunay mga lalaking miduol kaniya nga nangailhan nga sila si Jomar Balwa ug si Ceimploicio Conde nga miingon adunay nahitabo sa iyang sakyanan.  Si Balwa, taga Davao samtang si Conde lumad nga taga Masbate.

Maayo na lang mitan-aw pagbalik sa coffee shop ang Hapon ug nakita niining gibitbit na ni Tagon paingon sa gawas ang iyang bag hinungdan nga nagpatabang kini sa mga gwardiya ug nadakpan kini.

Si Tagon dali kaayong nitug-an sa kapulisan kun si kinsa iyang mga kauban ug subay sa maong impormasyon gilusad dayon ang operasyon batok sa grupo sa Brgy. Lamac sa lungsod sa Consolacion.

Nasikop sila si Edna Garcua, 49, taga Bacoor, Cavite nga giingong maoy leader sa grupo, Rosaly Gerudias, 36, taga Ozamis City, Jonar Alodria, 31, taga Cebu City.

Lakip sa nadakpan sila si Arnold Losarito, 48, taga Davao City, Mary Ann Abrasaldo, 39, taga Baybay,  Leyte ug sila si Balwa, 25, Conde ug Lasong.

Usa sa positibong miila sa mga suspek ang asawa ni Daluz nga si Sheila Mae Daluz kinsa positibong mitudlo kang Conde nga usa sa nibiktima kaniya diha sa Brgy. Sto. Niño, Cebu City sa miaging semana.

Matud niya kini maoy nituktok sa iyang sakyanan ug miingon nga dunay nangatagak sa luyo apan sa iyang pagsusi sa luyo, gibitbit sa mga kakunsabo ni Conde iyang bag nga dunay P120 mil gikan sa iyang sakyanan.

Paglabay sa pipila ka adlaw gibilin ang bag ni Daluz sa usa ka fastfood chain sa dakbayan sa Lapu-Lapu apan nakuhaan og footage sa CCTV cameras kinsay nagbilin niini ug nitakdo sila si Garcua ug Gerudias.

Si Police Regional Office-7 director, Chief Supt. Prudencio Bañas nipasalamat sa iyang mga sakop nga nadakpan ang grupo ilabi na nga nagkaduol na ang APEC Summit. Matud niya timailhan lang kini nga naglihok ang kapolisan. – /EIM) (BANAT NEWS)