Truck man namaak, nangilog armas

CEBU, Philippines – Natanggong sa selda sa Samboan Police Station ang 38-anyos nga truck man sa usa ka fish carrier human nangilog og armas ug namaak sa guwardiya sa pantalan sa Lite Shipping Lines sa barangay San Sebastian pasado alas 4 sa nakalabay nga hapon.

Ang suspek nga gituohang may nervous breakdown ang giila nga si Virgilio de Torres, minyo nga taga barangay San Antonio, Tocuran, Zamboanga del Sur.

Samtang ang mga nireklamo nga guwardiya naila nga sila si Danilo Rafols, 44, taga barangay Calatagan ug Leonardo Omaña, 29, taga barangay Cabotungan, Samboan, kinsa mga sakop sa Saint Jude Security Agency samtang lakip sa nabun-og ang usa ka porter sa pantalan nga si Cerilo Miramon, 27.

Sumala pa ni Police Officer 1 Cesar Catubig, desk officer sa Samboan Police Station nga diha’ng nagpaabot ang suspek ug kaubanan nga makasakay sa barko paingon sa dakbayan sa Dapitan, kalit lang nanghagis ang suspek.

Si Omaña nga nag-roving niadto’ng higayuna ang una’ng gilayog sa suspek ug nailogan sa dala nga shotgun.

Gamit ang kahoy nga gibangil sa ligid sa sakyanan, mao’y giibot sa suspek ug suway nga gibunal sa guwardiya apan maayo na lang kay nakalikay.

Si Rafols nga nakakita sa komosyon ang dali nga nitabang sa kauban lakip na si Miramon.

Apan matud ni Catubig nga gumikan sa ka daku sa suspek, yano ra kaayo niya’ng gipang-aswat ang tulo ka tawo nga nigunit kaniya.

Diha’ng hapit na malupig si de Torres sa nilayugay, iya’ng gipamaak sila si Omaña ug Miramon nga pulos nakaangkon og mga samad pinaakan sa bukton.

Nahunong lang sa paglugnot ang suspek diha’ng gigapos sa kamot ug tiil. Dugang ni Catubig nga swerte na lang kay wala namusil gamit ang shotgun nga nailog sa suspek.

Matud ni Catubig nga ang mga kauban sa suspek ang wala sab nasayud kun nganong gihimo kadto ni de Torres.

Sumala pa nga atol sa ila’ng biyahe, hilom ra kaayo ang suspek apan pag-abot sa pantalan nikalit lang og tukar ang utok. Mas nisamot pa ang kalibog sa mga polis kay sa diha’ng ila’ng gipangutana ang suspek kini niingon nga may lalaki nga nihunghong kaniya nga magkuha og balde aron saluron ang iya’ng dugo.

Nakita sab daw niya sulod sa barko ang mga lungon nga ang usa gitagana alang kaniya.

Si Catubig nagtuo nga lagmit duna’y problema sa pangisip ang suspek.

Dili na interesado pa nga mopasaka og kaso ang pamunoan sa pantalan ug ang mga guwardiya bisan og nakaangkon sila og mga bun-og.

Sigun pa ni Catubig nga kung wala’y ipasaka nga kaso batok sa dinakpan, ila’ng pagawson ang suspek.

Naproblemahan sa kapolisan kay dili na mogawas ang suspek nunot sa pagsige og ingon nga mamatay daw siya kung mogawas sa prisohan.

Hinuon ang mga kauban ni de Torres ang nagplano na nga ila lang gapuson ang suspek aron luwas sila nga makapauli sa Mindanao ug mahatud kini sa ilang panimalay nga buhi. – /GMR) (BANAT NEWS)