“Medicinal Marijuana” gilarot

CEBU, Philippines – Kapin 50 ka mga punoan sa draft marijuana ang gipangibot sa mga sakop sa Cebu City Public Safety Company (CCPSC) ug City Anti-Illegal Drugs Special Operations Task Group (CAIDSOTG) sa usa ka bakanteng lote sa Sitio Cogon, Brgy. Labangon ning dakbayan sa Sugbo kagahapon sa hapon.

Atol sa maong operasyon nadakpan ang tigtanom sa mga marijuana nga si Cecilio Cariñosa, 36, nga nagpuyo sa maong dapit ug sa usa ka mamalitay og marijuana nga si Rasan Dayupay, 31, residente usab sa maong dapit.

Sumala pa sa hepe sa CCPSC, Superintendent Melbert Esguerra nga nahinabi sa Banat News nakadawat sila og report nga duna’y mga marijuana nga gipangtanom sa maong dapit nga kilid lang sa mga panimalay.

Matud pa ni Esguerra, mugbo nga klase sa marijuana ang ilang naabtan nga haom sa tinago-tago nga operasyon. Matud niya,  sa ordinaryong tawo nga makaagi sa maong dapit magtuo nga mga bulak lang kini ug dili drugas.

Si Cariñosa nga nahinabi sa Banat News miangkon sa maong salaod apan miinsister kining medicinal marijuana nga para tambal sa mga sakit ang iyang gipangtanom. Matud niya unom pa lang kini ka bulan niya nga gitanom. Sumala pa niya, daghan nang mga tawo ang niduol kaniya nga nangayo niini para tambal sa sakit sa tiyan.

“Para tambal ra man g’yud ni , bisan pa og imong basahon sa Bibliya dili man bawal ning marijuana, nakatabang pa ko sa mga mangayo og tabang naku,” matud pa ni Cariñosa kinsa nagtuo nga gitahas kini kaniya sa Kahitas-an pagtanom sa maong mga medicinal marijuana aron makatabang sa uban.

Samtang si Dayupay labihan ang pagmahay kay matud niya igo ra siyang gipamalihog sa usa ka drayber pagpalit og marijuana kang Cariñosa.

Sa laing bahin, nasikop sa kapolisan sa dakbayan sa Sugbo atol sa buy-bust operation sila si Roy Yaun human nga mibaligya kini og shabu sa usa ka polis poseur buyer ,  nasikop ‘sab sila si Zaldy Subingsubing ug si Jeffrey Villanueva tungod sa paghupot og ginadiling drugas sa Sitio San Roque, Brgy. Lahug sa dakbayan sa Sugbo.

Siyam ka gagmay’ng  paketeng shabu ug duha ka medium packs nga mobalor og P120 mil  ang nasakmit gikan sa mga suspek. – /EIM) (BANAT NEWS)