Mga armas nasakmit
CEBU, Philippines – Moabot sa 20 ka mga klase-klaseng armas ang nasakmit sa Criminal Investigation and Detection Group-7 atol sa dungan nga pagpatuman sa duha ka adlaw nga “Oplan One Time Big Time” batok sa loose firearms lukop rehiyon.
Ang hepe sa CIDG-7 nga si Senior Superintendent Ritchie Posadas mipresentar sa mga armas nga ilang nakompiska gikan Pebrero 28 hangtod Marso 1 ning tuiga.
Pito ka high-powered ug 13 ka low-powered nga armas ang nasakmit sa maong mga operasyon nga miresulta usab sa pagkasikop sa pito ka mga tawo apan duha ang nakaeskapo.
Gawas sa armas nga ilang nakompiskar duna sa’y mga drugas nga nasakmit ang CIDG nga mikantidad og P23,000 ug duha ka airsoft nga armas.
Si Posadas gikan ang impormasyon sa mga tawo nga nag-ingong dunay gitagoang armas ang mga suspek. Ipaubos sa kapulisan sa ballistic examination ang tanan nga nakuha nga mga armas aron mahibaw-an kung nagamit ba kini sa mga krimen dinhi sa Sugbo ug sa rehiyon.
Sigun pa ni Posadas mas pahugtan pa nila ang operasyon batok sa mga tawo nga magdaladala og armas nga way papeles ug aron ‘sab pagsumpo sa mga armadong grupo nga posibleng mohimo og mga krimen. – /EIM) (BANAT NEWS)
- Latest
