Baboyan

CEBU, Philippines — Gawas sa pagpahuwam og puhonan ngadto sa mga tindera, ang Mandaue City Public Market Vendors Multi-Purpose Cooperative (MAVENCO) mohatag na usab og panginabuhian pinaagi sa pagpabuhi og mga baboy.

Ang MAVENCO nagtinguha nga palapdan ang ilang livelihood swine program ngadto sa kalungsoran sa probinsya dinhi sa Sugbo.

Si Mario Lito del Castillo, general manager ug executive officer sa MAVENCO, miingon nga kadto’ng gusto’ng mopahimulos sa ilang livelihood swine program kinahanglang miyembro g’yud sa ilang kooperatiba.

Ang gusto’ng mobuhi og mga baboy mag-andam lang og tangkal nga sarang kabutangan og 10 ka baboy ug hatagan dayon sila sa kooperatiba og mga baktin.

Kadto’ng mobuhi og mga baboy ubos sa livelihood swine program dili na kinahanglan nga mogasto pa kay ang mga pagkaon sa baboy, ang kooperatiba gihapon ang mohatag.

Kun ibaligya na ang mga baboy, anha pa ang kooperatiba mohatag og kwentada sa gasto sa pagkaon ug diha-diha hatagan dayon sa ilang bahin nga salapi kadto’ng mga nag-alima sa mga baboy.

Matag miyembro sa kooperatiba nga gusto’ng mobuhi og mga baboy hatagan og 10 ka baktin nga maoy ilang alimahan.

Ang executive officer sa MAVENCO nga si Emelinda Baquero miingon nga gibuksan na nila ang sanga nila’ng buhatan sa Gee Ann Square sa Barangay Tabunok, Talisay niadtong Sabado sa buntag.

Sa wala pa buksi ang sanga’ng buhatan sa MAVENCO sa Tabunok gipahigayon usa ang santos nga misa ug gisunod ang inagurasyon nga gitambongan sa kadagkoan sa Cooperative Development Authority.

Matud ni Baquero nga ang ilang mga sakop sa Talisay nagtinguha pagsalmot sa swine program kay aduna man sila’y luna nga kabutangan sa ilang mga tangkal sa baboy.

Gawas sa Talisay, ang MAVENCO may mga opisina usab sa dakbayan sa Lapu-Lapu ug lungsod sa Consolacion diin daghan na usab nga lumolupyo sa maong dapit ang nagpasakop sa ilang kooperatiba. (BANAT NEWS)