Magkapuyo gidakop tungod sa drugas

CEBU, Philippines – Gitanggong karon sa kapolisan ang managkapuyo nga giingong tigpayuhot og ilegal nga drugas ug nadakpan sila sa akto nga mibaligya og shabu atol sa buy-bust operation didto sa Barangay Poog, dakbayan sa Toledo.

Ang nadakpan mao sila si Felipe Obiso, hingkud ang panuigon, ug si Connie Consulta, 41, pareho sila nga nagpuyo sa Barangay Poog.

Ang buy-bust operation gihimo sa mga sakop ni Toledo City police chief Ricky Delilis ug ang team gilangkoban sa mga polis sa dakbayan sa Toledo.

Sila si Obiso ug Consulta nakuhaan og duha ka gagmay nga putos sa gituohang shabu, ang P200 nga buy-bust money ug drug-sniffing paraphernalia.

Gitanggong ang duha sa bilanggoan sa Toledo ug gikatakda nga pasakaan sila’g kaso karong adlawa adto sa piskaliya tungod sa paglapas sa Section 5, Republic Act 9165 kon Comprehensive Dangerous Drugs Act. Matud sa kapolisan nga ang magkapuyo taud-taud na nila nga gipanid-an human sila nakadawat og report nga sila nalambigit sa pagpamaligya og ilegal nga drugas.

Bisan ang mga sakop sa media kanunay’ng makadawat og reklamo gikan sa mga lumolupyo sa Toledo nga midagsang na pag-ayo ang pagpamaligya og shabu sa ilang lugar.

Samtang nasikop usab sa kapolisan sa Toledo ang usa ka suspetsado sa pagpanglungkab ug sa pagrekisa nakuhaan kini og pakete sa shabu.

Ang dinakpan mao si Moises James Araneta, 24, nga taga Barangay Luray Dos, dakbayan sa Toledo. Gidakop sa kapolisan si Araneta tungod sa pagduda nga siya ang milungkab sa balay ni Rosenda Lugsanay, 26, temporaryo’ng nagpuyo sa nahisgutang lugar. – /RUB) (BANAT NEWS)