Dugang away ni JVR, Villarante moulbo
CEBU, Philippines - Napanglantawan ang laing lalis tali nila’ng Talisay City Mayor Johnny De los Reyes ug Bise-Mayor Romeo Villarante.
Kini magsentro sa suwat hangyo ni Villarante may kalabutan sa pag-aprobar sa paghatag og punch cards ug entry cards sa 95 ka job order workers ubos sa Legislative Research and Codification Project.
Apan wala una gipanumbaling ni De los Reyes ang hangyo ni Villarante.
"Nadawat na nako pero ako pang tan-awon kung angayan bang hatagan. Dili na mahimo nga mag-angay-angay tang tanan kay sa una bitaw kung pila ilang pangayoon ako ma’ng ihatag, angay man gani ilang mga job orders pero sige man gihapon og reklamo," matud ni De los Reyes.
Gipadayag ni De los Reyes nga nasakitan kaayo siya human gi-akusahan sa oposisyon nga ni-hire og kapin 300 ka confidential job order personnel apan nahibaw-an nga 52 lang ang naa sa payroll base sa dokumento nga gipagawas sa City Accounting Office.
Hinuon si Villarante niangkon nga ang mayor lang ang adunay katungod nga mo-hire og casual employees ubos sa job order contracts.
"Maglisud gyud mi if dili mopirma siya sa akong request. Ang ubang job orders nga naa sa among office karon are working without salary now kay wala pa man sila'y punch cards," matud ni Villarante.
Apan matud ni Villarante nga kun dili mapirmahan sa mayor ang 95 ka job order workers maapektahan gyud ang trabaho sa Legislative. (Garry B. Lao/GMR)(BANAT NEWS)
- Latest
