Laing duha ka ofw gi-quarantine

CEBU, Philippines - Laing duha ka mga Overseas Filipino Workers gikan sa West Africa ang gipaubos sa quarantine sa Department of Health Central Visayas.

Karong Disyembre 22, gikatakdang tugotang makauli na sa iyang pamilya ang 62-anyos nga mining supervisor gikan sa nasud sa Sierra Leone.

Apan kining duha ka bag-ong nangabot nga OFWs naggikan sa nasud sa Liberia, ang usa sa mga nasud nga nagrabehan sa sakit nga Ebola virus.

Ang duha ipaubos sa 21 ka adlaw nga quarantine, nagpasabot kini nga dili nila ikauban ilang pamilya sa Pasko ug sa Bag-ong Tuig agi og panagana sa mga health officials nga di sila makatakboy sa maong makamatay nga sakit dinhi.

Sumala pa ni DOH-7 Ebola spokesperson nga si Dr. Dino Caing, ang duha nagtrabaho isip mga accountant sa Liberia, West Africa  ug nauli dinhi niadtong Disyembre 16.

"With the vigilance of our Bureau of Quarantine (BOQ) 7 headed by Dr. Emmanuel Labella, we were able to intercept two OFWs from Liberia. They were asymptomatic but we made them understand that they have to undergo mandatory quarantine to make sure Ebola does not enter the country and endanger the lives of Filipinos," matud pang Caing.

Gimando nga kinahanglang higpitan g’yud sa health authorities sa mga tugpahanan ug pwerto sa Central Visayas ang pag-monitor sa mga manguli nga OFWs tungod kay posibleng mataligam-an o tuyoon g’yung di motug-an sa tinuod ang pasahero kun asa sila nga nasud gikan. (Edwin Ian Melecio)(BANAT NEWS)