Margot-Mary Ann sa 2016?

CEBU, Philippines - Konsehal Margot Osmeña ug Konsehal Mary Ann De Los Santos magtandem isip mayor ug bise mayor sa eleksyon karong 2016?

Daghan ang nasurpresa sa mga nakakita sa post sa Facebook account ni Konsehal Alvin Dizon kagahapon diin nagpublikar ang giingon nga “M & M for BOPK in 2016 Elections.”

Adunay hulagway nga nagpakita nila ni Margot ug Mary Ann nga nagtupad pagpakuha og hulagway atol sa Christmas Party sa mga konsehal sa dakbayan nga didto gihimo sa private beach resort ni De Los Santos sa lungsod sa Carmen kaniadto’ng Huwebes.

Daghan kaayo ang mi-likes ug mi-share sa mao nga post ni Konsehal Dizon. Si Konsehal Eugenio Gabuya, laing konsehal nga alyado sa BOPK mi-post usab og mga hulagway sa mga konsehal nga pulos nag-isa sa ilang kamot.

Sa 17 ka konsehal sa dakbayan sa Sugbo, si Konsehal Ritchie Osmeña ug Dave Tumulak mao ra ang wala makatambong sa mao nga kalihukan.

Sila si Mayor Michael Rama ug Vice Mayor Edgardo Labella wala usab makatambong. Matud ni Rama nga wala siya giimbitar sa pagtambong sa mao nga Christmas party sa mga konsehal.

Usa ka konsehal nga alyado sa Team Rama mitug-an nga sa pagsugod sa ilang grupo, upat ra sila ka konsehal nga midaug sa ilang partido.

Matud sa mao nga konsehal nga pagka karon nagpabilin gihapon nga upat lang gihapon ka konsehal ang “die hard” sa Team Rama apan lahi na ang mga personalidad bisan og may tulo ka konsehal sa BOPK nga mitapon sa ilang pundok.

Gitug-an sa tinubdan kun kinsa ang upat ka konsehal nga nagpabiling “die hard” sa Team Rama apan gipugngan usa sa Banat News ang ilang mga ngalan.

Daghan ang nakabantay nga sa milabay’ng mga buwan wala na mag-adtoan si Konsehal De Los Santos sa opisina sa mayor. Gani kagahapon gipahibalo ni Rama nga ipatangtang niya si De Los Santos pagkasakop sa Bids and Awards Committee nga gitugyanan pagpili og kontraktor nga motukod sa bag-ong ospital.

Si De Los Santos miingon nga katungod sa mayor kun tangtangon siya sa BAC. Matud sa konsehal nga pagka karon sakop gihapon siya sa Team Rama apan wala motubag kun magpabilin pa siya nga alyado sa ilang grupo hangtud sa hangtod.

Si Konsehal Osmeña igo lang mikatawa diha nga gikuhaan og pamahayag kabahin sa kasuod na nila karon ni De Los Santos ug sa posibilidad nga sila ang mag-tandem sa 2016 elections. (Rene U. Borromeo)(BANAT NEWS)