Naghiling-hiling sa shabu nasikop

CEBU, Philippines - Wala’y suwerte ang 30-anyos nga lalaki human nasikop kapolisan dihang nalabyan nga nagpitik-pitik sa iyang kamot sa usa ka medium size nga gituohang drugas sa sitio Riverside, Duljo Fatima, dakbayan sa Sugbo pasado alas 7 sa niaging gabii.

Ang dinakpan naila nga si Roderick Dalogdog nga nagpuyo sa maong lugar. Matud ni PO3 Albert Sator, imbestigador sa Mambaling Police Station, nga paingon unta sila nga magsilbi sa warrant of arrest sa usa ka residente sa maong lugar apan mao’y ilang nakit-an ang maong lalaki nga naghilinghiling sa gituohang drugas. “Padulong mi mag-serve og warrant, nakit-an na namo siya sa eskinita nagpitik-pitik sa shabu sa may hayag,” matud ni Sator. Ang kapolisan nagduda nga kompyansiya ra kaayo ang suspek ug wala nakaila nga mga polis na ang kaatubang ug nipakita ra sab sa iyang dala nga shabu. Ang mga silingan sa suspek ang dali nihugop sa lugar ug nisuway og luwas sa dinakpan hinungdan nga kini ila’ng dali nga gidala sa presinto sa kapolisan. (BANAT NEWS)