Lending collector gipusil, giilogan sa motor
CEBU, Philippines - Love triangle ang nakita’ng hinungdan sa kapolisan sa pagpusil sa usa ka lending collector kinsa giilogan sab sa iyang motorsiklo sa B. Ranudo, Cogon-Ramos, dakbayan sa Sugbo kagahapon sa buntag.
Sa imbestigasyon sa Homicide Section sa Cebu City Police Office nasayran nga paingon na unta sa trabaho ang biktima nga si Lee Limosnero dihang kalit lang nibutho ang gunman dayun tion sa iyang liog og pusil.
Apan matud pa nigakar ang armas sa gunman hinungdan nga sa kahadlok sa biktima natumba ang iyang motorsiklo ug dali nga midagan.
Nakahigayon pa sa pagpusil og balik ang gunman hinungdan nga naigo sa paa ang biktima.
Gikuha sa gunman ang motorsiklo sa biktima ug nibulhot pagpadagan palayo sa lugar.
Gipasabot ni SPO1 Ruth Violango, imbestigador sa homicide section sa CCPO nga love triangle ang usa sa gisubay sa kapolisan human gikataho’ng sige kini’ng gihulga sa iyang kanhi hinigugma nga duna’y dautang mahitabo sa kasuko nga kini gibuwagan.
Matud ni Violango nga duna gyu’y plano ang gunman nga patyon ang biktima. “Naa gyu’y intent to kill ang gunman kay nganong gipusil pa man niya nga midagan naman unta ang victim ug tulis ug carnaping lang dili seguro. Basin gikuha ang motor aron mausab ang dagan sa imbestigasyon namo,” sigun pa ni Violango. Apan wala sab nila gipadaplin ang personal nga anggulo sa hitabo. (BANAT NEWS)
- Latest
