MCWD mopausbaw g’yud sa ilang water rate

CEBU, Philippines - Gibalibaran sa kadagkoan sa Metro Cebu Water District (MCWD) ang hangyo sa usa ka konsehal nga dili usa unta ipatuman ang pagpausbaw sa presyo sa ilang tubig nga gibaligya ngadto sa mga kunsomidor.

Matud ni MCWD General Manager Ernie Delco nga ang katapusan nila nga pagpausbaw sa presyo sa gisuplay nila nga tuig kaniadto pa’ng 2006, walo ka tuig na ang nakalabay.

Si Delco miingon nga ang MCWD wala magdawat og hinabang- pinansyal gikan sa nasudnong kagamhanan aron magamit sa pagpalambo sa ilang mga operasyon.

Miingon si Delco nga nanginahanglan sila karon og rate adjustment aron magamit nila nga palambuon ang serbisyo sa mga konsumidor sa MCWD, ilabi na karon nga gihunong na nila ang pagkuha’g tubig gikan sa tinubdan ilawom sa yuta.

Gipasabot ni Delco nga gihunong nila ang pagkuha og tubig gikan sa ilawom sa yuta kay nakabantay sila nga nag-anam na paghubas ang tab-ang nga tubig ug aron malikayan ang pagsulod sa tubig nga parat gikan sa dagat.

Ang mga konsehal sa dakbayan mipahigayon og public hearing kagahapon ug gipatawag ang mga opisyal sa MCWD aron magpakisayod sa pagpausbaw nila sa presyo sa tubig sugod Enero 1.

Ang mga kunsomidor sa tubig makabantay og kausaban sa ilang bayranan inigkadawat nila sa ilang water bill sa buwan sa Pebrero. Hinuon si Delco mitataw nga P1.60 lang ang usbaw sa matag cubic meter (lima ka baril) nga tubig.

Ang proyekto karon sa MCWD mao ang pagpalit og tubig gikan sa Manila Water nga gikuha gikan sa dako’ng sapa sa lungsod sa Carmen bisan og mas mahal ang kantidad sa mao nga tubig.

Matud ni Delco nga nabalaka sila sa MCWD kay nakabantay sila nga mianam-anam na pagsulod ang parat nga tubig sa mga dapit bisan gani diha sa Barangay Talamban.

Tungod niini, giundang na sa MCWD ang paghimo og mga bag-ong deep wells apan matud niya nga ang mga pribado’ng individual padayon sa ilang pagkuha’g tubig gikan sa tinubdan ilawom sa yuta. (BANAT NEWS)