Tulo sikop, duha nakasibat sa ronda
CEBU, Philippines - Tulo ang nasikop samtang duha ang naka-ipsot sa duha ka managlahing pagpang-ronda sa mga sakop sa Provincial Intelligence Branch (PIB) niadtong nakalabay nga adlaw.
Sa Consolacion, mokantidad sa P342, 200 nga drugas ang nasakmit gikan sa usa ka level 3 drug pusher sa barangay Lamac nga nakasibat apan nasikop ang iyang duha ka kauban niadtong Miyerkules sa gabii.
Ang nakaikyas naila nga si Dante Pilapil samtang ang nasikop naila nga sila Radney Cañete ug Giovani Auman.
Nakuha sa mga operatiba ang lima ka dagku nga putos sa gituohang drugas, usa ka medium size ug pito ka gagmay nga pakete nga mitimbang og 29 gramos.
Samtang usa ang nasikop sa buy-bust operation nga gihimo sa PIB sa Poblacion Tubod, Pinamungajan pasado alas 4 sa hapon niadtong Miyerkules samtang usa sab ang nakasibat.
Ang nasikop naila nga si Mario Lito Taneo samtang ang nakasibat naila nga si Bombie Taping nga nagpuyo sa maong lugar. Nakuha sa mga awtoridad gikan sa dinakpan ang usa ka daku nga putos sa gituohang drugas nga mikantidad og P59, 472.
Gitanggong na sa karsel sa Cebu Provincial Police Office (CPPO) ang mga dinakpan samtang lakip sa pasakaan og kiha ang mga nakasibat sa pagpangronda. (BANAT NEWS)
- Latest
