Kaingkwentro sa CIB nakapabuto
CEBU, Philippines - Positibo sa paraffin test ang duha sa tulo ka suspek nga gika-ingkwentro sa mga sakop sa City Intelligence Branch (CIB) sa Cebu City Police Office dihang nilikay sa checkpoint sakay sa duha ka motorsiklo.
Duha ang patay sa nahitabong pinusilay tali sa kapolisan kinsa giila nga sila si Ebaresto Itang ug Dean Mark Codeñera samtang angol ang ilang kauban nga si Joseph Cueva.
Sa resulta sa paraffin test nagpositibo sila si Codeñera ug Cueva samtang negatibo si Itang ug gituohan nga wala nakabuto ang armas niini apan usa ka bala ang duna’y igo sa trigger apan wala nibuto.
Matud sa hepe sa CIB, Supt. Romeo Santander, nga ang resulta sa test nagpamatuod nga may nahitabo nga pinusilay sukwahi sa gibutyag ni Cueva nga sila gipamusil sa kapolisan.
“This is to show nga there was a shootout nga nahitabo gyud, mao na ni ang atong gipaabot nga result, kay naa man gyu’y uban moingon nga nagtumo-tumo lang o something so this is the official result now,” matud ni Santander.
Gisusi usab kung dili ba tampered ang engine ug chassis number sa duha ka motorsiklo nga gisakyan sa tulo ka lalaki.
Ang maong mga dokumento magamit sa kapolisan kung mopasaka og kaso ang pamilya sa namatay sigun ni Santander.
Dugang ni Santander nga iya na nga na-estorya ang usa sa pamilya sa namatay ug iyang gipasabot sa hitabo ug igo na lang sila magpaabot kung mopadayun ba sa pagsang-at og reklamo. (BANAT NEWS)
- Latest
