Kapitolyo na ang modumala sa My Home
CEBU, Philippines - Ang kagamhanan sa probinsiya sa Sugbo mao na unya ang modumala sa “My Home,” usa ka youth rehabilitation facility nga nahimutang sa Barangay Tayud, lungsod sa Consolacion.
Si Capitol Social Worker Mary Rose Lopez nagkanayon nga ang Provincial Social Welfare and Development Office (PSWDO) migahin na og P6 milyones alang sa operasyon sa pasilidad sugod karong Enero.
Ang nahisgutang pasilidad maka-accommodate og 60 ka bata ug sa sunod buwan ipahigayon na ang turnover niini ngadto sa probinsya.
Ang “My Home” mao kini puy-anan sa mga menor de edad nga nakalapas sa balaod ug pagkakaron 23 ka menor ang nagpuyo sa maong pasilidad nga gipaubos sa “psychological rehabilitation” o “diversion programs”.
Ang maong pasilidad modawat lang kini sa mga bata’ng menor nga nagpanuigon gikan sa 10 ngadto sa 15-anyos. Ang My Home adunay duha ka andana nga building nga gitukod sa JPIC-IDC sa lote nga gipagamit kanila sa Department of Social Welfare and Development (DSWD).
Ang mao nga building adunay therapy room, clinic, counseling room, activity ug tulo ka dagko’ng kwarto nga matag usa maka-accommodate og 10 ka bata. Ang My Home, proyekto kini sa Justice, Peace and Integrity of Creation-Integrated Development Center (JPIC-IDC) Inc. nga gidumala sa mga pari sa SVD. (BANAT NEWS)
- Latest
