Hinabang gisupak sa seniors

CEBU, Philippines - Mikabat sa 570 ka senior citizens sa barangay Capitol Site, dakbayan sa Sugbo ang nipirma og manifesto alang sa ilang pagsupak sa sugyot nga tibhangan og P2,000 ang ilang madawat nga Christmas Financial Assistance Funds aron idonar sa katukuran sa Cebu City Medical Center (CCMC).

Base sa official website sa Office of the Senior Citizens Affairs, ang barangay Capitol Site adunay 1,068 ka registered senior citizens.

Mipasabot ang mga senior citizen nga nalipay sila sa maong pinansiyal nga hinabang nga magamit sa ilang matag adlaw nga maintenance.

Matud sa mga senior citizens nga ang katukuran sa CCMC responsibilidad sa gobiyerno. Ang mga senior citizens naglaum nga makadawat og P12,000 nga financial assistance gikan sa kagamhanan sa dakbayan sa Sugbo niining tuiga.

Sa nahisgutang kantidad, ang mga registered senior citizens sa dakbayan una na’ng nakadawat og P7,000 nga pinansiyal  nga hinabang ug karong Disyembre gilauman nilang madawat ang dugang P5,000 nga pinansiyal nga hinabang. (Brenda D. Batuto gikan sa The Freeman/GMR)

 Lola patay, usa  angol sa aksidente

Patay ang usa ka 79-anyos nga lola human mabanggai og jeep de pasaheroan pasado alas 9:00 sa miaging gabii sa Basak Pardo, dakbayan sa Sugbo.

Ang namatay naila nga si Marcelina Navares, biyuda, molupyo sa Villabuena, Barangay Kinasang-an, dakbayan sa Sugbo. Ang drayber sa jeep naila nga si Celso Quintinita, 23, lumad nga taga Malabuyoc apan kasamtangang nagpuyo sa Cogon Pardo sa dakbayan.

Si Navares nalamba ug nabunal ang ulo daplin sa karsada human nabanggaan sa jeep nga gimaneho ni Quintinita hinungdan sa iyang kamatayon.

Samtang naangol ang drayber sa usa ka motor human nabangga kini sa usa ka sports utility vehicle kagahapon sa hapon.

Ang biktima naila nga si Concordio Talandron, 57, taga Cogon, Naga City samtang ang drayber sa SUV naila nga si Jerick Badayos, 35, taga Inayagan, Naga City.

Sumala pa ni Aliñabo nga ang SUV kalit nga niliko aron magpatubil sa may Tunghaan, Minglanilla apan wala nakabantay si Talandron ug nabangga.

Daling gidala sa South General Hospital ang maong biktima ug luwas na kini sa makuyaw nga kahimtang.  (BANAT NEWS)