Tigpatanto gipatay

CEBU, Philippines - Patay ang usa ka babayeng tigpatanto human kini gipusil samtang nagkuyog sa bag-o pang nahiuli niya nga banang usa ka Overseas Filipino Worker (OFW)  diha sa dalan Juan Luna Extension, Barangay Poblacion, Dakbayan sa Danao.

Si Senior Police Officer 3  Ildefonzo Prosia sa Danao City Police Station miila sa biktima nga mao si Rayling Ranario, 38, taga Barangay Tuburan Sur sa nahisgotang dakbayan.

Matud pa ni Prosia nagkuyog ang biktima ug ang iyang bana nga si Alexander Nicolas Ranario  naglakaw pauli sa ilang panimalay dihang gisundan sa motorsiklo nga giluwanan sa duha ka wala hiilhing lalaki.

Dihang naabot sa tungod ang motor, ang backrider kalit mipusil sa bukobuko sa biktima duha ka higayon  ug milapos sa dughan niini.

Ang mga mamumuno daling mipasirit palayo dihang nahagba ang biktima, si Alexander daling mitabang sa asawa ug gihatod kini sa Danao Provincial Hospital apan gideklarar kini nga dead on arrival.

Si Prosia miingon nga ilaha pang gisubay ang motibo sa krimen apan usa sa ilang gitan-aw ang pagpautang sa biktima og kwarta sanglit base sa nakuha nilang impormasyon, ang mga kabanay walay nahibaw-ang dunay nakaaway ang ginang.(Romeo T. Limpangog/EIM)

Tulis duol sa CCPO

Misamot og gara ang mga tulisan dinhi sa Sugbo, kagahapon sa kaadlawon gitulis sa duha ka armadong lalaki ang usa ka convenience store nga nahimutang  singkwenta metros gikan sa Cebu City Police Office diha sa dalan Gorordo.

Ang Florence Convenience Store gitulis sa duha ka armadong lalaki ug  gisakiyo ang halin nga P5 mil, tulo ka mobile phones sa mga empleyado ug nanguha pa g’yud og grocery items sama sa sigarilyo, usa ka botelyang bino ug deodorant para sa ilok.

Matud pa alas-3 sa kaadlawon naabot ang duha nga pulos nagsuot og helmet, 5’4 hangtod 5’5 ang gitas-on, kasarangan ang panglawas, nagsuot og itom nga t-shirts ug armado og .45 caliber pistol.

Giingong nangutana pa una ang mga tulisan kun mahimong mag-inom sa gawas apan dihang nigawas gikan sa kasilyas ang kahero diretso silang gipangtionan og armas ug mideklarar og tulis.

Ang deputy chief sa Police Regional Office -7 nga si Senior Superintendent Conrad Capa misusi sa crime scene ug mipatawag og command conference uban sa hepe sa CCPO Sr. Supt. Noli Romana ug station commanders.

 “But this statistics will not matter ang problema ang impact n’yan so we have to check this. This cannot go on. Kaya nandito ako just to emphasized enough the desire of the regional director to address this problem,” sigun pa ni Capa.

Ang kapulisan sa dakbayan sa Sugbo ang nagtinguha karon nga makakuha og kopya sa close circuit television (CCTV) sa maong establisamento.

Mga kolektor gitulis

Samtang tulo usab ka kolektor ang gitulis sa managlahing dapit ug nasakiyo ang kapin P200 mil nga koleksyon sa tulo nga nahitabo sa lungsod sa Badian ug sa dakbayan sa Naga.

Didto sa lungsod sa Badian, usa ka Rodel Cabasag, 25, kolektor sa Reynolds Loading Center ang gitulis sa duha ka mga lalaki samtang nangolekta sa bukirang bahin sa maong lungsod.

Matud pa sa Officer In-Charge (OIC) sa lungsod sa Badian nga si Inspector Henry Orbiso nga nahinabi sa Banat News, ang biktima nangangkon nga  gibabagan iyang agianan sa usa ka motorsiklo nga giluwanan sa duha ka lalaki.

Matud pa nga diretsong gitionan og armas ang biktima ug gikuha ang dala  niini nga backpack nga dunay sulod nga P180 mil ug ang iyang personal nga kwartang P5 mil.

Samtang sa dakbayan sa Naga duha ka kolektor sa lending ang nabiktima sa pagpanulis, didto sa Barangay Pangdan.

Ang mga biktima naila nga sila si Marvin Raneses, 30, ug Sopronio Edulan, 22, pulos taga Mabolo, Cebu City ug nagtrabaho sa Lebcan Financing Company Inc.

Duha ka lalaking sakay og usa ka motorsiklo  ang mihunong sa ilang tungod samtang sila nangolekta ug gipangtionan sila og armas ug gipanguha ang ilang koleksyon nga mikabat tanan og P22 mil ug gitilok pa og dala ang P300 nga sulod sa ilang pitaka.

Human sa pagpanulis dali sab nga misibat ang duha ka tulisan paingon sa dakbayan sa Toledo. (BANAT NEWS)