PNP, Coast Guard alerto
CEBU, Philippines - Gipaubos na sa high alert status sa Police Regional Office -7 ang tibuok rehiyon samtang red alert usab ang Philippine Coast Guard sa pagsaulog sa kalag-kalag.
Matud ni PRO-7 Director Prudencio Tom Bañas nga ubos sa kamandoan, wala na’y tugutan nga bisan kinsa nga polis nga maka- leave ug ang mga naka-leave ang gimandoan sa pagbalik sa trabaho.
Kagahapon sa buntag subling gilibot sa mga opisyal sa PRO-7 ang mga sam-ang sa dakbayan ug lakip na ang Cebu South Bus Terminal.
Hinuon atol sa ilang pagsubay, gikalipay sa mga opisyal ang hugot nga seguridad nga gipatuman.
Samtang gipahibawo ni Cebu Coast Guard Commander Weniel Azcuna nga ilang gipakatap ang ilang mga sakop sa paggiya sa mga pasahero sa barko.
Giingong 30 porsiyento ang pagsaka sa gidaghanon sa mga pasahero hinungdan nga gipaubos sa red alert status ang mga pantalan.
Dunay 12 ka K9 units ang gipakatap sa pantalan, special operations group, tulo ka rubber boats ug 22 ka aluminum boats ang giandam.
Gipahibawo ni Azcuna nga daghang mga shipping companies ang mi-apply og special permit sa Maritime Industry Authority alang sa dugang mga biyahe. (Jojo C. Ugdol ug Decemay P. Padilla/GMR)(BANAT NEWS)
- Latest
