Tulisan midaginot sa P140 nadakpan

CEBU, Philippines - Gidemalas ang usa ka gipasanginlang tulisan human nga wala kini makabantay nga gisundan siya sa drayber sa taksi nga iyang gitulis diha sa dalan M.V Patalinghug Avenue, Barangay Pajo, dakbayan sa Lapu-Lapu.

Ang tulisan nga nadakpan dayon ni Police Officer 2 Marciano Berdiose  giila nga si Ryan Quinloan, 33, taga Sitio Langub, Poblacion sa maong siyudad.

Samtang ang biktima mao si Mario Tanguan, Jr., 30, residente sa Barangay Canjulao, driver sa Spider Taxi.

Matud ni Police Officer 1 Jason Elnar sa Lapu-Lapu City Police - Station 3 , gikan pa naghatud og pasahero ang biktima apan sa iyang pagbalik, gipara kini sa suspek.

Nakurat na lang si Tanguan dihang dunay talinis nga butang nga gition kaniya ang pasahero ug mideklarar og tulis.  Bisan P140 pa lang ang kita ni Tanguan gidaginot kini sa suspek kinsa dali dayong mikanaog ug milakaw.

Apan gisundan kini ni Tanguan ug dihang dunay daghang tawo, misiyagit siya og “tulisan,” si PO2 Berdiose kinsa naatol nga diha sa dapit daling miresponde ug gidakop si Quinloan.

Ang suspek natanggong na karon sa karsel ug pasakaan og kasong pagpanulis ugmang adlawa.  (BANAT NEWS)