Donation box sa Birhen nahanaw

CEBU, Philippines - Nahanaw ang donation box sa Birhen Maria nga gipahimutang sulod sa munisipyo sa lungsod sa Tabogon niadtong Martes sa gabii.

Matud ni PO3 Epifanio Comedido sa Tabogon Police nga nahinabi sa Banat News nga ang asawa sa mayor sa ilang lungsod nga si Gloria Duterte ang mipahibawo sa kapolisan dihang didto na sa lungsod sa Medellin nahibaw-an nga nawala ang maong box.

Katapusang nakita ang box sa usa ka Jose Montebon ang in-charge sa pagsirado ug pag-abli sa munisipyo dihang nanirado siya alas 5:07 sa hapon sa Martes.

Pagkabuntag sa wala pa gibalhin ang imahen paingon sa Medellin, dunay misa nga gihimo ug usa ka parokyano ang mohulog unta og kwarta sa donation box apan wala na kini.

Pag-abot sa Medellin, dihang naplastar na ang imahen, daku na lang ang ilang katingala nga wala na ang box.

Ang katawhan nagtuo nga kini nahabilin lang sa Tabogon apan sa pagsubay kini nawala gyud.

Sa pagsubay sa kapolisan, wala’y timailhan nga gilungkab ang munisipyo ug daku ang ilang pagduda nga inside job ang hitabo.

Duda si Comedido nga dunay nagpaniid sa maong box ug nagtuo nga daku-daku na ang sulod human kini nakalibot na sa 13 ka lungsod ug sa siyudad sa Danao.

Dunay giimbitar ang kapolisan nga mga lalaki nga nag-ayo sa aircon sa munisipyo apan negatibo ang ilang imbestigasyon.

Ang imahen ni Birhen Maria maoy gidala sa Mary Help Christian sa Balikatan Kaunlaran Foundation nga mihimo og paglibot sa amihanang bahin sa Sugbo isip kabahin sa Annual Rosary sa buwan sa Oktubre. (Jojo C. Ugdol/GMR)(BANAT NEWS)