Usa patay sa PDEA raid

CEBU, Philippines – Usa ang patay samtang usa ang angol sa nahitabong pinusilay atol sa pagpangronda sa mga sakop sa Philippine Drug Enforcement Agency-7 sa gituohang drug den diha  sa Sitio Aroma, Barangay Pulang-bato ning dakbayan kagahapon sa buntag.

Sumala pa sa report sa Balitang Bisdak sa GMA -7 kagahapon, ang namatay mao si alyas Dagyk, 15,  samtang ang naangol mao si Jovanni Papas, 28.

Atol sa pagsuwat ning balita, gikompirmar sa North General Hospital nga usa ang patay sa  duha ka lalaking napusilan nga gidala sa ilang tambalanan kagahapon, apan nagdumili sila pag-ila kun kinsa.

Nakaikyas  ang target sa PDEA nga si Randel Miñosa kinsa daling midagan human   masayri nga awtoridad ang mipalit kaniya.

Samtang ang nasikop mao si Reswin Leyson, 23, taga Adla-on ning dakbayan.

Si Mark Maramba ang Operations Chief sa PDEA-7 nga nahinabi sa mga tigbalita ang mikompirmar sa maong engkwentro, matud pa niya sila maoy giunhan pagpusil sa mga lalaki sa maong drug den. Tungod niini, nangayo sila og backup sa Talamban Police ug miresponde ‘sab ang mga sakop sa Special Weapons and Tactics (SWAT) Team sa Cebu City Police Office.

Apan sa pag-abot sa SWAT Team ug mga sakop sa Talamban Police nakabiya na sa lugar ang mga sakop sa PDEA-7 dala ang duha ka mga samaran nga lalaki ug gidala sa North General Hospital.

Sa nakita sa Banat News sa mao’ng lugar duna’y mga pat-ak sa mga dugo sa lugar ug dunay mga payag nga gihimong drug den ug makita sa sulod nga bahin ang daghang tin foils.

Si Atty. Charles White ang legal officer sa PDEA-7 nga nahinabi sa Banat News mitug-an nga 33 ka putos sa marijuana , duha ka pakete sa gituohang drugas ug usa ka .45 caliber pistol ang narekober sa maong lugar.

Sigun pa ni White andam silang moatubang kung dunay moreklamo sa mga napusilan tungod kay lehitimo ang ilang operasyon.

Sa pakighinabi sa Banat News ni Leyson kini miangkon nga  miadto siya sa lugar aron unta mopalit og drugas apan naabtan kini sa buy-bust sa mga operatiba.  – /EIM) (BANAT NEWS)