Baha sa Tabunok Market sulbad na

CEBU, Philippines - Gisulbad na sa kagamhanan sa dakbayan sa Talisay ang problema sa baha ug kabaho sa kanal palibot sa Tabunok Public Market.

Si Talisay City Mayor Johnny Delos Reyes nangunay sa pagsuperbisar sa iyang mga sakop ug pagpahimutang sa vacuum truck nga iya sa kagamhanan sa dakbayan sa Mandaue.

Matud sa anak sa mayor, City Administrator John Yre Delos Reyes, nga daku kaayo ang ilang pasalamat kang Mandaue City Mayor Jonas Cortes sa libreng pagpagamit sa ilang kahimanan nga wala’y gasto ang Talisay.

Nunot niini nanawagan si John Yre sa katawhan nga dili magpataka og labay sa basura nga makapuno pagbalik sa kanal nga moresulta na sab unya sa pag-awas sa baha.

Si John Yre miingon nga daku kaayo og natabang ang vacuum truck sa Mandaue nga maoy nakahabwa sa lapok sa kanal.   

Nasayran nga taud-taud na nga nangreklamo ang mga manindahay gumikan sa kabaho dihang miawas ang kanal sa may dalan Coles.

Ang alisngaw sa baho ang mosugat sa mga tawo nga mobisita sa lugar lakip na sa mga kustomer.

Gani pipila ka mga manindahay miingon nga sila mismo nangasakit na tungod sa grabeng baho nga kanunay nilang mahingos.

Dunay pipila nga mireklamo nga dili maayo ang ilang kita tungod kay wala na’y mamalit.

Ang Public Information Officer sa Talisay, Vince Monterde, mibutyag nga ang pagkaguba sa ilang kahimanan nga mosuyop sa mga baha maoy hinungdan nga nalangay ang paglimpyo sa dapit.

Ang gihimo sa niaging adlaw sumala pa ni Monterde gitawag og Operation Habwa tungod kay lakip sa ilang gihabwa ang sagbot nga nakabara sa imburnal.

Gumikan sa maong kalamboan mipadayag sa ilang kalipay dili lang ang mga manindahay sa lugar apil na ang mga motorista nga moagi. (BANAT NEWS)