Patay’ng lawas sa OFW giilogan

CEBU, Philippines - Grabe’ng away nahitabo sa usa ka punerarya sa dakbayan sa Mandaue sa miagi’ng adlaw diha nga ang asawa ug igsuon sa namatay nga Overseas Filipino Worker (OFW) nga gikan sa Saudi Arabia naglalis kun asa ilubong ang minatay.

Ang OFW nga taga lungsod sa Argao gikataho nga namatay tungod sa usa ka aksidente didto sa Saudi Arabia ug gipadala na lang ang iyang patay’ng lawas balik dinhi sa Sugbo.

Gipugngan lang sa Banat News ang ngalan sa mao nga OFW.  Samtang gihaya ang patay’ng lawas sa punerarya diha sa Mandaue, gihikay na ang pagsulod niini sa lungon.

Ang mga igsuon sa namatay gusto nga ang patay’ng lawas adto dad-on sa ilang dapit sa Consolacion aron adto ilubong. Ang mga tinugyanan sa punerarya mitug-an sa Banat News nga ang mga igsuon sa namatay maoy miawhag kanila nga kuhaon ang kargamento sa airport.

Kaniadto’ng kaadlawon sa Martes, ang asawa sa namatay miabot ug misupak sa hukom sa mga igsuon nga ang patay’ng lawas sa iyang bana adto ilubong sa Consolacion.

Tungod sa mainiton nila nga panaglantugi, ang asawa mikuha og abogado aron maoy makapasabot sa iyang mga bayaw nga siya maoy adunay dako’ng katungod sa lawas sa iyang bana.

Ang mga tinugyanan sa punerarya mitug-an nga anam-anam nga mikalma ang mga igsuon sa namatay diha nga ang abogado mipasabot nga ang balaod naghatag og dako’ng katungod sa asawa sa paghipos sa patay’ng lawas sa iyang kapikas.

Nahibaw-an nga ang OFW taud-taud na diay nga nagkabuwag ug sa iyang asawa. Ang mga igsuon sa namatay nga OFW mitug-an nga sa matag higayon nga mopauli dinhi sa Sugbo ang ilang igsuon wala na gani kini mopauli sa Argao. Matud pa nga bisan og wala na mopauli sa Argao ang nahisgotan nga OFW, apan padayon kini nga nagpadad-anan og suporta sa iyang pamilya.

Adunay miingon nga ang namatay nga OFW nagpa-insured og dakong kantidad sa wala pa kini mamatay. Sigon sa report nga karong adlawa ang patay’ng lawas sa OFW dad-on na sa Argao aron adto ilubong. (BANAT NEWS)