Gikulata, gilugos

CEBU, Philippines - Usa ka 23-anyos nga lalaki ang gidakop sa kapolisan sa Consolacion human gireklamo nga mikulata ug milugos sa usa ka 13- anyos nga gipasaligan niyang ihatud sa ilang balay gikan sila nangaligo og dagat niadtong Huwebes.

Matud pa ni PO3 Arthur Ariate sa Consolacion Police Station ang gidakop (pangalan gipugngan) taga Sitio Laray, Pitogo, sa mao gihapong lungsod.

Sumala pa sa alegasyon sa dalagita, nangaligo sila og dagat kauban sa ilang mga higala ug ang suspek  diha sa usa ka beach resort sa Liloan ug sa ilang pagpamauli nianang pagka alas-8 sa gabii, miboluntaryo ang suspek nga siya na lang maoy mohatud sa biktima sa ilaha.

Apan nakugang ang dalagita nga samtang sila nagsakay sa motor kalit nga misimang og dalan ang suspek padung sa awaaw nga dapit sa barangay Nangka.

Tungod kay nagduda kini nga dunay dautang tuyo ang suspek kaniya nagmagahi ang biktima pagsugot apan giingong gikulata siya niini ug gitionan og kutsilyo.

Wala nay nahimo pa ang biktima ug nalugos g’yud kini sa suspek. Apan sa pag-abot sa biktima sa ilaha nabantayan sa iyang inahan ang mga bun-og niini hinungdan nga mitug-an ang biktima sa nahitabo kaniya.

Daling midangop ang pamilya sa kapolisan ug giadto ang suspek sa balay niini sa  Barangay Pitogo hinungdan sa pagkasikop niini.(Romeo T. Limpangog/EIM) (FREEMAN)