Polis gigamit pangilad

CEBU, Philippines - Mokabat dul-an P15 mil nga kantidad sa load ang nakuha sa usa ka mangingilad nga nagpaila nga usa ka pari human nakabiktima og duha ka negosyante sa Poblacion Argao, Cebu, kagahapon sa hapon, mga polis pa ug ang ilang deputy police chief maoy gisugo sa pagpangilad.

Midangop sa kapulisan ang usa ka Maria Gonzalez, 24, tag-iya og usa ka kan-anan sa maong lugar human nga nakahatag og load sa maong nagpaila nga pari  nga nagkantidad P7,300.

 Ug ang usa ka biktima nga wala na lang nagpa- blotter sa kapulisan ang matud pa nakuhaan ‘sab og halos P8,000 nga kantidad sa load.  Sumala ni PO2 Renato Nacaytuna sa Argao Police nga nahinabi sa Banat News nga lakip siya ug ang ilang deputy chief nga si SPO4 Esteban Albuera ang nailad sa maong nagpaila nga pari ug sila pa ang gisugo aron maestorya ang usa sa tag- iya sa karenderia.

Lunes sa buntag duna’y nadawat nga tawag ang ilang deputy chief sa cellphone gikan sa nagpaila nga si “Fr. Alea” nga nangangkong bag-ong pari sa  maong lungsod ug namalihog nga ipasusi ang usa ka kan-anan kay mangaon ang iyang mga kauban.

Tungod niini giadto ni Albuera ang kan-anan kay gusto niining makaestorya ang tag-iya sa kan-anan sa iyang cellphone.

Apan paglabay sa pipila ka minutos, si Nacaytuna na usab ang nakadawat og tawag sa ilang telepono ug misugo kaniya nga magpa-check sa lain na usab nga kan-anan ug didto giingong samtang nag-estoryahanay sa cellphone giilad sa maong lalaki ang tag-iya nga magpa-load kini sa mga numero nga iyang ihatag. 

Apan nakabantay si Nacaytuna nga daw ilad ang nanghitabo mao nga iyahang gipugngan ang tag-iya ug nagkuyog sila pagsusi sa simbahan ug didto nag-abot sila sa lain na usab nga negosyante nga si Maria Gonzales nga mag-verify  unta kung nadawat ba ang load.

Tinud-anay nga dunay pari nga Fr. Alea nga usa pa lang ka buwan sa Argao apan mihimakak kini nga nangayo siya og load.

“Nakabantay na man ko nga murag nag-estorya sila sa number sa load card nga nasipyat og hatag, mao ‘to nga nangutana ko nangayo ba og load ang pari, kay pwerti na man nila nga kiniskisay sa load card,” matud pa ni Nacaytuna.

Nakabantay ‘sab ang maong polis nga daw sa duna’y sagol nga tinagalog ang inistoryahan sa nagpailang pari. “Professional kaayo og tingog, mura g’yud pud og tinuod,” sigun pa ni Nacaytuna.

Human sa nagpailang pari nga nangilad duna na sab unta’y mitawag sa ilang buhatan nga gustong mangayo og numero sa mayor ug tourism office apan sa dihang gipangutana kini kun unsa ilang tuyo, kalit lang giputol ang  linya.

Tambag karon sa kapulisan sa Argao nga dili na lang g’yud dali nga motuo ni bisan kinsa  ug mas maayong subayon una kini aron dili mailad. (BANAT NEWS)