Tulo gipatay tungod sa drugas

CEBU, Philippines - Anggulo sa drugas ang nakita nga hinungdan sa kapulisan sa kamatayon sa usa ka 19- anyos nga babaye sa bukirang bahin sa Consolacion, Dalaguete nga nakit-an sa usa ka mangahuyay kagahapon sa buntag. Ang nakitang nagsugod na og kadugta ang lawas ni Jenny Vergara, duna’y ka live-in partner ug nagpuyo sa Balud, Dalaguete.

Matud pa ni SPO2 Cleo Pia, imbestigador sa Dalaguete Police nga Sabado pa sa buntag katapusang nakita sa iyang inahan nga buhi ang anak human kini mibisita sa iyang tindahan.

Sumala pa ni Pia nga base sa ilang nakuha nga impormasyon may kalambigitan sa illegal drugs ang motibo sa kamatayon ni Vergara apan wala pa silay matumbok nga responsable sa krimen.

Apan matud pang Pia, ang inahan niini hugtanon nga nihimakak sa maong impormasyon tungod kay wa nalambigit sa drugas ang iyang anak.

Sumala pa nga may nakuhang P500 sa lawas niini apan nawala na ang gidalang cellphone, tablet ug P5,000.

Samtang duha ang patay ug duha ‘sab ang angol sa duha ka managlahing pagpamusil nga nahitabo kagahapong adlawa sa dakbayan sa Sugbo.

Unang gipusil patay sa Sitio Panaghi-usa, Basak San Nicholas, Cebu City, alas 7 sa buntag ang usa ka Marlon Cabillon.  Matud pa ni SPO4 Rey Cuyos, sa Homicide Section sa Cebu City Police Office anggulo sa drugas ang ilang gisundan nga motibo sa pagpatay kaniya. Si Cabillon  gipusil sa ulo samtang natulog sa bangko sa gawas sa usa ka balay.

Samtang pasado alas-3 sa hapon , lain na ‘sab nga insidente sa pagpamusil ang nahitabo didto sa L.Flores Street, Pasil, Cebu City, diin usa ang patay ug duha ang nangapagan.

Wa pa  mailhi sa kapolisan ang pangalan sa namatay tungod kay way nakaila kaniya sa lugar, apan napagan sa pagpamusil sila si Jovencio Betco, 50, ug Catherine Petallar, 45, pulos molupyo sa maong lugar.Usa ka basiyo sa bala nga .45  ang nakuha sa lugar. (BANAT NEWS)