100 Balay naugdaw

CEBU, Philippines - Usa ka lalaki nga gituohang sabog sa drugas ug gidudahan nga mao’y hinungdan sa dakong sunog sa Sitio Little Pasil, Kamputhaw, Cebu City ang gisikop sa kapulisan kagahapon sa kaadlawon.

Si City Fire Marshall Rogelio Bongabong miingon nga moabot sa kapin 100 ka mga balay ang gikaon sa kalayo ug P200 mil ang danyos tungod kay ginama kasagaran sa light materials ang mga balay.

Ang alarma sa sunog nadawat sa mga bombero alas 4:54 sa kaadlawon ug giisa dayon sa 3rd alarm tungod kay paspas kaayo ang pagkatap sa kalayo apan nakontrolar kini sa alas 5:28 na sa buntag.

Ang hepe sa Fuente Police nga si Chief Inspector Wildemar Tiu mitug-an nga ilang gidakop si Orlando Mendoza, 29, tungod kay maoy gisumbong sa mga silingan nga maoy hinungdan sa sunog.

Sa pamahayag ni SFO3 Roylen Maratas, usa ka Roque Dacalcal ang nakadungog og singgit gikan sa balay ni Mendoza ug nakita niya kining nagdala og lighter paggawas ug miulbo dayon ang dako nga sunog sa balay niini.

Gibabagan ni Dacalcal si Mendoza hinungdan nga sila nagsinukmagay hangtud nga kini gidakop sa mirespondeng mga polis ug nakuha kaniya ang usa ka lighter.

Apan kusganong gihimakak sa suspek ang pasangil kay matud niya pag-abot niya nasunog na ang ilang balay. (BANAT NEWS)