FTP cop hayan mataktak

CEBU, Philippines - Pasakaan og kasong grave threats ang managsuong polis nga gipasanginlan nga misulong sa balay sa ilang silingan sumala pa ni Chief Inspector Aileen Recla ang hepe sa Investigation and Detection Management Branch (IDMB) sa Cebu City Police Office.

Kagahapong adlawa ang hepe sa IDMB nangayo na sa San Nicolas Police sa investigation report sa maong insidente ilabi na ni PO1 Jane Anne Magdalera, 23, nga usa pa ka Field Training Police (FTP) nga nadestino sa maong buhatan.

Matud pa ni Recla nga ang IDMB sa Bohol na ‘sab ang mo-imbestigar sa magulang ni Jane Anne nga si PO1 Josephos Magdalera, 25, nga nadestino sa Regional Public Safety Battalion-7. Kung mapamatud-ang guilty, si Recla mibutyag nga posibling matangtang sa pagkapolis si  Jane         Anne.

Ang duha ka magsuon ang giakusaran kini sa ilang silingan nga si Gladys Joy Allosada nga misampalong ug mition pa og armas kaniya atol sa ilang kagubot niadtong gabii sa Lunes.

Gipasabot pa sa hepe sa IDMB nga ubos sa police regulation, gidili sa mga FTPs ang pagdala og armas. Duha ka mga armas ang gi-surrender sa duha nga naglakip sa Glock 17 pistol ug 45 pistol. Samtang ang polis nga si Jane Anne mopasaka ‘sab og kaso batok sa mga Allosada tungod sa pagbun-og kaniya. 

Gahapong adlawa si Jane Anne padayon pa gihapon nga mi-report isip FTP sa San Nicolas Police Station, samtang ang igsoon niini nga si Josephos mi-file na og leave. (BANAT NEWS)