Manag-uyab mitulis sa taksi

CEBU, Philippines -  Usa ka taxi drayber ang gitulis sa iyang pasahero nga babaye ug lalaki sa dalan M.C. Briones, Barangay Tipolo, Dakbayan sa Mandaue kagahapon sa kaadlawon.

Ang biktima mao si Junrey  Haroy, 33, drayber sa CTC  Taxi kinsa igo na lang pagsumbong sa kapolisan human nadala sa duha ang iyang kinitaang P1,200 ug cellphone.

Si SPO1  Alin Carrado sa Presinto 2 sa Mandaue  City Police Office (MCPO)  miingon nga nanakay ang mga suspek nga nag-holding hands pa diha sa mao gihapong dalan ug mimando nga magpahatud sila sa IT Park, sa dakbayan sa Sugbo.

Apan paglabay nila sa usa ka bangko pipila lang ka metros gikan sa ilang pagdagan gipahunong ang biktima kay mag-withdraw kuno og kwarta sa ATM ang duha apan nakurat na lang si Haroy nga gitionan siya og armas sa lalaki dayon gikuha sa babaye ang iyang kinitaan ug cellphone dayong ikyas.

Ang biktima daling nakapangayo og tabang sa mga kauban pinaagi sa radyo apan wa na nila maapsi pa ang mga tulisan hinungdan nga midangop na lang kini sa polis.

Samtang gidemalas ang usa ka gwardiya sa Re Phl Gasoline Station sa North Poblacion, sa dakbayan sa Naga human nga gidisarmahan sa duha ka armadong tulisan nga napakyas pagtulis sa gibantayan niining gasolinahan.

Ang gwardiya nga si Joven Sales, 32, gikan pa sa kasilyas ug nakurat na lang paggawas niya dihang gisugat kini og armas ug gikuha ang iyang .38 revolver nga may tulo ka bala.

Matud pa nga gisuwayan sa mga tulisan pagkuha sa halin sa gasolinahan apan nakabantay ang kahera ug nang-lock sa sulod ug mitago.

Ang mga tulisan way nahimo misibat na lang palayo sakay sa motorsiklong way plaka. (BANAT NEWS)