May cyber porn sa Badian
CEBU, Philippines- Laing tulo ka mga babaye nga nabiktima sa cyber pornography sa lungsod sa Badian ang midangop sa buhatan ni Bise Gobernador Agnes Magpale diha sa buhatan niini sa Provincial Welfare Commission.
Sa wa pa mabulgar ang pagpamugaw sa usa ka magtutudlo sa upat ka mga estudyante sa Liloan sa miaging semana, una nang giimbestigar sa PWC ang reklamo sa usa ka babaye gikan sa Badian nga misumbong kabahin sa operasyon sa cyber pornography sa maong lungsod.
Matud pa nga nasuko ang maong babaye kay wa kini bayari sa tawo o nag-operate og cyber porn diha sa ilang lungsod. Nasayran nga gawas sa maong reklamante duna pa kini kaubang duha ka mga babaye nga kaparehas niya nag-edad na og kapin sa 30-anyos.
Si Magpale nakugang sa maong impormasyon tungod kay ilang nasayran nga maayo og kabutang ang maong mga reklamante base sa ilang mga pinuy-anan. Nagtuo si Magpale nga gusto lang sa maong mga babaye ang dali nga kita tungod ba kaha sa kadaghan sa galastuhan.
Hinuon nagpasalamat si Magpale sa maong mga babaye nga mihatag og impormasyon ug nagsugod na sila pagpangita sa uban pang biktima sa maong cyber porn operator alang sa kasong ipasaka. - /EIM) (BANAT NEWS)
- Latest