Nangawat nitago ilawom sa kama
CEBU, Philippines- Bisan nitago ilawom sa kama, nasikop gihapon sa kapolisan ang usa ka lalaki nga naaktohang nangawat sulod sa usa ka compound sa may New Era, Mabolo, dakbayan sa Sugbo.
Matud ni Senior Insp. Hartzel Peter Billedo sa Cebu City Police Office (CCPO) nga misulod ang suspetsado sa kwarto sa biktima ug gikuha ang Huawei Tablet balor og P10 mil.
Ang nadakpan giila nga si Wenmark Ravanes, 34, nagpuyo sa maong dapit samtang ang biktima mao si Catrina Ann Ravanes, 31.
Naaktohan ug nakit-an sa biktima ang suspetsado nga nangawat ug tungod sa kahadlok misutoy og dagan sa ilang balay ug mitago.
Ang biktima nangayo og panabang sa kapolisan kinsa daling miresponde ug nasikop ang suspetsado sulod sa ilang panimalay nga mitago sa ilawom sa kama. Wala nabawi sa kapolisan gikan sa suspetsado ang gikawat niya nga butang.
Kasamtangang gitanggong sa detention cell sa CCPO ang suspetsado kinsa pasakaan og kasong pagpangawat. - /GMR) (BANAT NEWS)
- Latest
