Sweldo sa JO gikuhaa’g buhis

CEBU, Philippines - Nagbagolbol ang mga job order (JO) nga kawani sa Talisay City Hall human gikaltasan og buhis ang ilang sweldo.

Dili momenos P200 hangtud kapin sa P300 matag adlaw ang madawat sa mga job order nga kawani depende sa ilang trabaho. Dunay maka-trabaho sulod lang sa 15 ka adlaw, dunay usa ka buwan ug dunay co-terminus o hangtud kanus-a mahuman sa termino ang opisyal nga mi-hire kanila sa pagtrabaho.

Ang Talisay City Hall adunay kapin sa 1,000 ka job order sa pagkakaron.

Niadtong milabay’ng buwan si Mayor Johnny De los Reyes miluwat kini og memorandum nga nag-awhag sa mga JO sa pagduso og  tax identification number (TIN) sa Human Resource Division.

Ang mga JO gipapirma og form sa Bureau of Internal Revenue (BIR) alang sa ilang TIN.

Ang maong memorandum sa mayor gipasikad sa kamandoan sa BIR nga ang tanang JO kaltasan og tres porsiyento nga government money payment (GMP) ug dos porsiyento nga expanded withholding tax sa kinatibuk-ang kantidad sa ilang sweldo.

Ang mga JO makaltasan sa nahisgutang buhis kaduha sa usa ka buwan.  (BANAT NEWS)