Puya nadugta na napalgan

CEBU, Philippines - Nagsugod na pagkadugta ang usa ka fetus nga napalgan kagahapon sa buntag daplin sa karsada sa Ramona 1, San Isidro, dakbayan sa Talisay habig sa Cebu South Coastal Road.

Ang maong fetus gibana-banang walo ngadto sa siyam ka buwan giputos og kolor brown nga tualya.

Ang hepe sa mga tanod sa nahisgutang barangay nga si Jerry Bustillo ang nanawag sa Talisay City Police Station ug nangayo og panabang.

Sila si SPO1 Mikie Espina, SPO1 Yvonne Illustrisimo, PO2 Jude Enemecio ug PO1 Stephen Sefuesca ang daling miresponde.

Ang fetus gidala sa mga polis ngadto sa sam-ang publiko sa Cansojong ug ilang gilubong samtang ang kapolisan mihimo sa dugang imbestigasyon. (Brenda D. Batuto/GMR)  

Naglingkod daplin sa dalan gipusil patay

Patay ang usa ka ulitawo human pusila sa wala pa mailhing gunman nga sakay sa motorsiklo pasado alas 7 sa nakalabay nga gabii sa eskina V. Aranas ug Lakandula, Pahina Central, dakbayan sa Sugbo.

Ang biktima naila nga si Dennis Seban, 37, nagpuyo ra sa maong lugar.

Matud ni SPO4 Rey Cuyos sa homicide section sa Cebu City Police Office (CCPO) nga nahinabi sa Banat News nga samtang naglingkod ang biktima kilid sa karsada, kalit lang kini nga gihunongan sa usa ka motorsiklo ug ang back rider ang kalit mipusil sa biktima.

Igo sa nagkalain-laing bahin sa lawas ang naangkon ni Seban nga dali pa untang gidala sa Cebu City Medical Center (CCMC) apan nakabsan gyud sa iyang       kinabuhi.

Nakuha sa kapolisan sa crime scene ang tulo ka basiyo sa bala sa .45 caliber pistol nga gituohang gigamit sa mamumuno.

Sumala pa ni Cuyos nga nakakuha sila og impormasyon nga niadto lang 2012 nakagawas sa bilanggoan si Seban gumikan sa kasong pagpangawat.

Blangko pa ang kapolisan kung unsa ang motibo sa pagpamusil diin sumala pa sa mga residente nga nakakita nga paingon sa Tres de Abril misibat ang motorsiklo nga gisakyan sa gunman. (BANAT NEWS)