Napakgang paghikog nasuko, tulo gidunggab

CEBU, Philippines - Usa ka lalaking gibadlong sa iya untang paghikog nasuko ug naghuramentado ug nakadunggab sa tulo niya ka mga silingan diin usa ang kritikal diha sa Sitio Banica, Barangay Quiot, Cebu City, kagahapon sa hapon.

Ang misulay unta sa paghikog ug nanunggab sa iyang mga silingan naila nga si Rex Chato, 33. Samtang ang mga biktima naila nga sila si Roldan Romano, 44, Aurelio Gabuya, 56, ug Reygiel Sadorra, 19.

Matud pa ni PO1 Michael Angelo Singson sa Homicide Section sa Cebu City Police Office (CCPO) nga nahinabi sa Banat News nga gusto unta nga magpakamatay si Chato gamit ang usa ka pisi apan nakit-an kini ni Romano ug gibadlong.

Apan nasuko na hinoon kini ug mikuha og kutsilyo ug gidunggab si Romano sa bukton ug abaga, atol sa iyang pagdagan naagian niini si

Sadorra  ug gidunggab sa makadaghan sa likod.

Si Aurelio Gabuya pagkakita sa nahitabo sa dalaga mitabang unta niini apan siya na usab ang gidunggab sa abaga ug bukton. Tungod sa komosyon midagsa ang mga silingan ug gitabangan kini pagdakop.

Ang mga biktima gidala sa Cebu City Medical Center (CCMC) samtang nakuha gikan sa suspek ang kapin sa 10 ka pulgadas nga kutsilyo. - /EIM) (BANAT NEWS)