Pito ka “pusher” nadakpan
CEBU, Philippines - Pito ka mga gipasanginlang drug pushers sa barangay Babag ug Mactan ang nasikop sa buy-bust operations sa siyudad sa Lapu-Lapu.
Ang mga sakop sa Station 3 sa kapolisan pinangulohan ni Senior Inspector Wilbert Parilla milusad og operasyon sa sitio Beauty in the Sky, Babag ug miresulta kini sa pagkasikop nila ni Jet Berdin Dumosmog, 35, Ivhor Berdin, 31, Nola Jean Bucayan, 22, pulos mga residente sa maong dapit.
Samtang nadakpan usab si Placido Dungog Dico, 40, taga Villa Amakan, Timpolok, Babag dakbayan sa Lapu-Lapu.
Nakuha gikan sa mga suspek ang walo ka gagmay’ng pakete sa gituhuang shabu ug P200 nga marked money ug drug paraphernalia. Samtang laing buy-bust operation ang gihimo sa mga sakop sa City Anti- Illegal Drug Special Operations Task Group (CAIDSOTF) pinangulohan ni Senior Inspector Rogelio Pineda Jr. Diin laing upat ka mga drug pusher ang ilang nasikop.
Ang nasikop mao sila si Arnulfo Bentillo Bautista, Myla Canete Boniel, Jenny Silawan Casinillo ug ang igsuon niini nga si Demy Silawan Casinillo, mga residente sa maong dapit.
Si Bautista gikatahong level 3 drug pusher sa maong dapit kay mohalin kini og mga 25 gramos matag semana, ang mga kauban niini maoy iyang kakunsabo pagpasapasa sa ilegal nga drugas.
Atol sa pagkasikop sa upat nakuhaan sila og mga pinaketeng mga shabu nga mokabat og balor P100 mil. Kasong kalapasan sa RA 9165 ubos sa Art. II Sec. 5, 11 ug 12 ang kasong ipasaka sa mga drug pushers. (BANAT NEWS)
- Latest
