Nag-amok, bata ug lalaki naangol

CEBU, Philippines - Usa ka lalaki ang kalit nga midunggab sa iyang 7-anyos nga pag-umangkon ug sa usa ka tawo nga igo rang milabay sa ilang dapit diha sa sitio Hawad, Bulacao, Talisay City.

Sa inisyal nga imbestigasyon sa kapulisan, ang 7 anyos nga biktima (gipugngan ang ngan), natulog kauban ang iyang inahan dihang kini gidunggab diha sa dughan sa iyang uyuan nga si Julius Bahian Bernido, 30.

Gawas sa bata, usa ka lumalabay nga giilang si Jovelito Miramontes Novo, 27, residente sa sitio Candaya, Mohon, sa maong dakbayan ang giapil og dunggab sa suspek ug naigo sa tuo nga bahin sa iyang lawas.

Ang duha gidala sa Vicente Sotto Memorial Medical Center samtang ang suspek nadakpan ug nakuha usab ang 13 pulgadas nga kutsilyo nga gituohang gigamit sa maong krimen.

Matud ni PO2 Edwin Campomanes sa pakighinabi sa Banat News nga bag-ohay pang naabot gikan sa Ozamis City ang suspek ug giingong kalit kining nanghasi.

Sa gihimong imbestigasyon nasuta nga nakakita og away sa Ozamis City ang suspek ug gituohang mao kini hinungdan sa pagpanghasi niini.

Si SPO1 Ricardo Balbutin sa Talisay City miingon nga base sa pamahayag sa kapuyo sa suspetsado tiggamitan kini og ginadili nga drugas. (BANAT NEWS)