2nd Capt. Raul Cabanero Cup banatan na

CEBU, Philippines - Ang gikahinaman nga 2nd Capt. Raul Cabanero Cup Inter-collegiate Basketball Tournament pormal nang mosikad karong gabii didto sa Bulacao Sports Complex, dakbayan sa Talisay.

Mga duwa karon

7:00 pm

CIT-U vs. UC

 8:30 pm

UV vs. USPF

Nag-una sa listahan sa mga entrante mao ang defending champion  University of San  Jose-Recoletos  (USJ-R) Jaguars.

Mopakita sab og aksiyon ang 16th CESAFI champion University of the Visayas (UV) Green Lancers. Lain pang koponan nga miyembro sa CESAFI nga mosalmot mao  ang University of San Carlos (USC) Warriors, University of Cebu (UC) Webmasters, University of  Southern Philippines Foundation (USPF) Panthers, (SWU) Southwestern University   Cobras ug ang Cebu Institute of Technology-University  (CIT-U) Wildcats.

Sukwahi sa miaging edisyon, karong tuiga ang matag team gitugtan na  nga mopaduwa sa ilang import.

Mosubay sila og single round robin format sa elimination  diin ang  Top 4 moabante sa crossover semifinals ug ang mga mananaog maoy mag-ilog sa titulo sa usa ka knockout game.

Ang liga ubos sa  bendisyon sa CESAFI  pinaagi sa ilang commissioner nga si Felix Tiukinhoy Jr.

Nahimo ang maong liga sa paningkamot ni Bulacao Brgy. Capt. Raul Cabanero sa abag sa iyang mga konsehales ilabi na nila ni Banjo Abastillas, Darwin Cabanero ug committee on sports chairman Agnes Lastimosa. Suportado sab kini sa Task Force Alpha.

Ang liga ubos sa superbisyon ni CESAFI deputy commissioner Danny Duran ug technical head referee Edwin Dejacto  Sr. (BANAT NEWS)