Paglisudlisod sa pamakuna  

Samtang wa makab-ot ang target nga gidaghanon sa bakunahan (84% ra sa 9 milyones) sa tulo ka adlaw nga National Vaccination Drive, may mga leksiyon nga kon makat-onan makatabang sa paghimong mas paspas sa pagpamakuna:

- Una, ang kadaghan sa nagpabakuna niadtong Lunes, Martes, ug Miyerkules nagmatuod nga ang katawhan di supak sa mga bakuna batok sa COVID-19; ug

- Ikaduha, niabot og 7.6 milyones ang nabakunahan, o duha ug tunga ka milyon kada adlaw kay mas sayon ang pagpabakuna, mas duol ang vaccination sites, ug giatiman ang tanang gusto nga magpabakuna.

***

Dako ang tentasyon para sa lokal ug nasudnong mga opisyal sa gobyerno sa pagtulisok sa katawhan. Luya ang pagpamakuna kay nituo ang katawhan sa sayop nga kasayuran nga makadaot ug makamatay ang mga bakuna. Maong imbes palambuon ang mga paningkamot sa pagpasabot sa kaluwas ug ka-epektibo sa mga bakuna:

- Nidangop nang mga opisyal sa panghudlat nga mawagtangan sa panginabuhi o di na kagawas sa ilang mga pinuy-anan ang mga way bakuna; ug

- Nirekomendar na nga himuong pinugsanay ang pagpamakuna aron nga mabalhog sa prisohan ang mga way bakuna.

***

Ang mas dasig nga pagpabakuna sa katawhan atol sa National Vaccination Drive nagmatuod nga di ang tanang way bakuna supak o nagduda o nahadlok sa mga bakuna. Nagkinahanglan lang sila og dugang kasayuran ug kahigayonan.

Hinaot nga hunungon na ni Presidente Rodrigo Duterte ang pagpasidaan, seryuso o komedya man, nga sak-on sa kabalayan ang mga way bakuna aron tusukon samtang nangatug ug ang bugalbugal nga ang mga way bakuna bati og nawong.

***

Makatabang sab kon hunungon sa labing daling panahon ang paglisudlisod sa mga magpabakuna:

- Pagpangita og kaliboan ug usa ka dokumento sa mga magpabakuna, apil nang birth certificate sa mga bata gikan sa Philippine Statistics Authority (PSA), affidavit og guardianship sa mga kuyog sa mga bata ug barangay clearance pagmatuod nga molupyo (mas maayo kon botante) sa lungsod o syudad diin magpabakuna; ug

- Pagpili sa vaccination sites nga mas duol ug mas sayon para sa kinabag-an sa mga magpabakuna ug di para lang sa kasayon sa mga mamakuna, ni sa pagpalambo sa pamolitika o sa mga negosyo sa mga suod sa mga tagduma.