Ihap pilay mga bakunang mohupas
May sukaranan ang kabalaka nga karong nasulbad na ang kanihit sa mga bakuna batok sa COVID-19 mopuli ang laing problema: Ang pakiglumba sa panahon aron nga madapat sa labing nagkinahanglan og panagang batok sa kagaw sa di pa mohupas ang mga bakuna.
Kataposang ihap ni vaccine czar Carlito Galvez Jr. nagbutyag nga dunay kapin sa 39 milyones ka doses sa mga bakuna ang naa sa mga bodega sa Department of Health (DOH), local government units (LGUs) ug pribadong mga kompaniya. Wa siya maghisgot hangtod kanus-a nga magamit ang mga bakuna.
* * *
Makalili na hinuon ta gikan sa ubang tinubdan sa kasayuran unsa kaseryuso ang nagkaduol nga paghupas sa mga bakuna:
• Ang pribadong mga kompaniya nipahibawo nga mohupas na sa Nobyembre, o pila ka adlaw na lang gikan karon, ang 400,000 ka doses sa bakuna sa Moderna nga kabahin sa mas dakong shipment ilang gikontrata; ug
• Ang DOH Central Visayas nipasidaan nga duha ka milyon ka doses sa mga bakuna nga nadawat sa mga opisyal sa Sugbo, Bohol, Negros Oriental, ug Siquijor ang mohupas sa di pa matapos ning tuiga.
* * *
Nagsobra ang bakuna sa pribadong mga kompaniya kay, tungod sa kalangay sa pag-abot sa ilang kinompra, ang ilang mga trabahante nakapabakuna na sa vaccination sites sa gobyerno. Nagsobra ang mga bakuna sa Central Visayas tungod sa kaluya sa pagpamakuna sa LGUs.
Nisugyot ang pribadong mga kompaniya nga tugotan silang mogamit sa bakuna isip booster shots sa di pa mo-expire. Nihulga ang DOH nga kuhaon ang mga bakuna gikan sa nagluya nga LGUs ug ibalhin sa mas kugihan nga mamakuna.
* * *
Nahadlok ko nga di lang ang Central Visayas ug mga kompaniya nga nakapalit og Moderna ang naalarma sa hapit na paghupas sa ilang mga bakuna. Pero way tabang nga gitanyag ang nasudnong gobyerno nila gawas sa pasalig ni Galvez nga patas-an ang target sa pamakuna ngadto sa 1.5 milyones kada adlaw.
Nakapa-inutil sa administrasyon ni Presidente Duterte sa pagsulbad sa mga problema sa pandemya nanukad sa pagdumili sa pag-angkon sa mga problema. Mas ganahan silang mobandilyo sa way kinutoban nga mga pasalig, sa way pagpasabot sa katawhan unsaon sa pagpatuman ni pag-detalye unsaon pagpalihok sa burukrasya.
- Latest
