Si Kongresista Jinky Luistro ang unang nipahibawo nga nakadawat og kuwarta gikan sa China ang usa sa mga kompaniya ni Bise Presidente Sara Duterte. Giila niya ang kompaniya nga mao ang Cale88 Foods Corp. nga nalista sa mga dokumento sa Anti-Money Laundering Council (AMLC).
Pero mas daghan og detalye si kanhi senador Sonny Trillanes. Dili lang ang kantidad (?319 milyones) ug ang produkto sa kompaniya (banana chips). Kon dili ang ka-kuwestiyonable sa negosyo (walay trabahante, walay pabrika, walay halin, ug ?8,000 ra ang binuwan nga bayranan sa kuryente).
Mahibaw-an sa pagpadayon sa impeachment trial karong semanaha, kanus-a tukion nang mga dokumento sa AMLC uban ni Executive Director Ronel Buenaventura, kon motakdo ba ang kasayuran ni Trillanes sa mga ebidensiya sa prosekusyon.
Ambot pila ka oras o pila ka adlaw, hinaot dili maabtan og pila ka semana (tungod sa walay kinutoban nga technicalities), ang gikinahanglan sa prosekusyon pagkuha sa mga detalye (nga mahimo lang kon mopatawag sa uban pang mga testigo) nga nakumplito sa pagpahibawo ni Trillanes ngadto sa media ug sa publiko sulod lang sa pipila ka minuto.
Ang bag-o nga kasayuran sa press conference ni Trillanes posibleng dili na matuki sa impeachment trial (apil nang mga anggulo sa ilegal nga drugas ug China). Pero hinaot nga dili makalimtan lang tungod sa mas dinaliang kawsa pagpalagpot ni VP Sara.
Hinaot nga nakasugod nang imbestigasyon sa Ombudsman aron paghipos sa dugang mga ebidensiya nga makapalig-on sa plunder ug ubang mga kaso nga ipasaka dayon batok ni VP Sara kon mapalagpot sa puwesto.
Bisan gi-isnab sa impeachment court, labing daogan sa niaging semana si Trillanes (kay napahinumdoman ang katawhan nga siya ang nagsugod ug labing isog ug labing suhito nga nibisto sa bank accounts sa mga Duterte kapin sa 10 ka tuig sa wala pa supinahi).
Labing pildero mao silang Presiding officer Chiz Escudero (kay napahinumdoman ang publiko sa iyang pagsabotahe sa impeachment trial sa niaging tuig ug pagbalitok sa majority bloc karong tuiga aron dili mapriso sa plunder sa flood-control scam) ug VP Sara (nga nagkadugay nagkaklaro nga peligrong mas grabe pa sa iyang amahan nga gipasanginlang berdugo ug kawatan).