Dihang nideklarar si kanhi Cebu City mayor Tommy Osmeña sa iyang suporta ni bisan kinsang modagan batok ni Mayor Mike Rama sa eleksiyon sa 2025, si Cebu City Councilor Franklyn Ong ang usa sa labing naglibog:
• Suod kaayo siyang Osmeña, gibugal-bugalan gani sa iyang mga amigo nga ipausab ang iyang apelyido ngadto sa “Ongmeña”;
• Human napilde ang Bando Osmeña Pundok Kauswagan sa duha ka sunudsunod nga eleksiyon sa 2019 ug 2022, gikatahong nisikit na si Ong ni Rama; ug
• Nabali ang iyang damgo nga maghiusa pagbalik silang Rama ug Osmeña.
* * *
Pero si Ong dunay laing problema. Ang iyang amigo nga si Lapu-Lapu City Mayor Ahong Chan, nga gikatahong iyang gigastohan sa nangaging mga eleksiyon, mas lig-on og kontra ug busa nagkinahanglan og mas daghang kuwarta sa 2025. Si kanhi mayor Paz Radaza gihapon ang ikaatbang, pero gigikatahong suportahan sa mas dakong puntil ni Kongresista Sonny Lagon.
Si Lagon gikatahong nasuko kay gihilabtan ni Chan ang usa sa iyang mga negosyo sa Opon. Giingong nipaluyo na gani si Lagon sa mga nanagan pagka barangay kapitan batok sa mga alyado ni Chan.
* * *
Gawas nilang Ong ug Chan, gikataho nga wa say tarung kinatulgan si Mandaue City Mayor Jonas Cortes. Kay sibawng mga huhungihong nga modagan pagka mayor batok niya si Kongresista Lollypop Ouano.
Napilde si Ouano ni kanhi Mayor Luigi Quisumbing niadtong 2016 tungod sa alyansang Cortes-Quisumbing. Nidaog pagka kongresista si Ouano sa 2019 ug 2022 ug napilde ni Cortes si Quisumbing sa 2019 tungod sa alyansang Cortes-Ouano. Kinsay makakuha og mas lig-ong alyado maoy makabentaha.
* * *
Ang alyansang Radaza-Lagon gikataho nga dunay mga kundisyon: Una, mag-running mate si Lagon ni Radaza sa 2025; ikaduha, usa ra ka termino sa pagka mayor si Radaza; ug ikatulo, si Lagon nay modagan pagka mayor sa 2028.
Pero sama sa nahitabo nilang Osmeña, Rama, Ong, Cortes, Quisumbing, ug Ouano, ang alyansa nilang Radaza ug Lagon maigo sa panultihon nga sa politika way permanenteng mga higala kon dili mga interes ra. Way garantiya nga kon makabalik sa City Hall, mapul-an si Radaza ug mopadaplin ni Lagon sa sunod eleksiyon. Kon mahitabo, mahimong makalimot sab silang Lagon ug Chan sa ilang giawayan.